Անցեալ շաբաթ օր Արաբական լիկայի կեդրոնին մէջ գումարուեցաւ արաբ արտաքին գործոց նախարարներու արտակարգ նիստը, որ նուիրուած էր Երուսաղէմին:
Այս առիթով, Ազգային ազատ հոսանք կուսակցութեան ղեկավար, արտաքին գործոց նախարար Ժըպրան Պասիլ արտասանեց ցնցող խօսք մը:
Պասիլ կոչ ուղղեց միջարաբական հաշտութեան` ընդգծելով, որ անիկա միակ միջոցն է փրկելու արաբ ազգը եւ վերագտնելու անոր ինքնութիւնը:
Պասիլ հաստատեց Երուսաղէմին նուիրուած արաբական վեհաժողով մը գումարելու կարեւորութիւնը` նշելով, որ արաբները պէտք է վերադարձնեն Երուսաղէմը, առանց որուն ո՛չ արաբները եւ ո՛չ արաբականութիւնը գոյութիւն կ՛ունենան:
Ան ընդգծեց արաբական բոլոր երկիրներուն մէջ գործադրուող ժողովրդային մէկ ինթիֆատայի անհրաժեշտութիւնը:
«Աստուած մի՛ արասցէ, որ այս տագնապէն յուսալքուած դուրս գանք. յեղափոխութիւն կամ մահ` քնացող ազգին», շեշտեց Պասիլ:
Ան յայտնեց, որ բոլորը կը փափաքին Երուսաղէմի մէջ աղօթել եւ իբրեւ այդպիսին պիտի չարտօնեն Իսրայէլին, որ արգիլէ զիրենք Երուսաղէմի մէջ աղօթելէ:
Պասիլ շեշտեց, որ Երուսաղէմն է իրենց արաբական ինքնութիւն պարգեւողը` աւելցնելով, որ կա՛մ անմիջապէս պէտք է շարժիլ եւ կա՛մ Երուսաղէմը կորսնցնել: