ՍՏԵՓԱՆԱԿԵՐՏ.- Արցախի Հանրապետութեան նախագահի մամլոյ խօսնակ Դաւիթ Բաբայեան պատասխանեց «Առաջին Լրատուական»ի թղթակիցին հարցումին: ՀՅԴի նախաձեռնած Հայաստան-Արցախ փոխգործակցութեան համաձայնագիր կնքելու հարցով ստորագրահաւաքին վերաբերեալ ի՞նչ կարծիք ունի Բաբայեան: Նախագահին խօսնակը տուաւ հետեւեալ պատասխանը. «Իւրաքանչիւր քաղաքական ուժ իր ռազմավարութիւնն ու մարտավարութիւնն ինքն է ընտրում՝ կախուած բազմաթիւ խնդիրներից, առկայ իրավիճակից, նպատակներից եւ այլն: Եթէ դա արւում է օրէնքի շրջանակներում, այդտեղ որեւէ խնդիր չկայ: Ինչ վերաբերում է ինձ, ես ունեմ իմ անձնական մօտեցումն այդ հարցում, որը հետեւեալն է. այո, կարեւոր է, որ միգուցէ այդպիսի փաստաթուղթ լինի, բայց նոյնիսկ առանց նման փաստաթղթի առկայութեան, Հայաստանի եւ Արցախի փոխգործակցութիւնը պաշտպանութեան ոլորտում գտնւում է շատ բարձր մակարդակի վրայ: Այսինքն՝ լաւ կը լինի, որ այդ փաստաթուղթը լինի, բայց առանց դրա էլ մեր փոխգործակցութիւնը շատ բարձր մակարդակի վրայ է: Եթէ ստացուի ստորագրել, լաւ, բայց մենք չպէտք է զգացմունքային մօտենանք այս խնդրին: Պէտք է բոլոր հարցերը քննարկենք, կշռադատենք, տեսնենք, թէ ինչ հաւանական բացասական կամ դրական զարգացումներ կարող են լինել: