Հինգշաբթի, 15 նոյեմբեր 2018-ին, Դամասկոսի «Ֆոր սիզընս» պանդոկի «ալ-Հալապի» սրահին մէջ Սուրիոյ Հանրապետութեան Արժանեաց շքանշանով պարգեւատրուեցաւ Սուրիոյ մէջ Հայաստանի հանրապետութեան արտակարգ եւ լիազօր դեսպան դոկտ. փրոֆ. Արշակ Փոլատեանը:
Պարգեւատրումը կատարուեցաւ Սուրիոյ արտաքին գործոց փոխնախարար Ֆէյսալ Միքտատի ձեռամբ: Պարգեւատումէ առաջ փոխնախարար Ֆէյսալ Միքտատ բարձր գնահատեց Դեսպան Փոլատեանի անձն ու գործունէութիւնը, հայ ժողովուրդի հաւատարմութիւնը, հայ-սուրիական յարաբերութեան մէջ անոր դերակատարութիւնը, յատկապէս Սուրիոյ պատերազմի ընթացքին ու մանաւանդ Հայաստանի Հանրապետութեան ցուցաբերած զօրակցութիւնը Սուրիոյ ճգնաժամի օրերուն: Փոխնախարար Միքտատ աւելցուց ըսելով, որ հայ ժողովուրդը թուրք իշախանութիւններու կողմէ 100 տարիներ առաջ ենթարկուած էր ցեղասպանութեան եւ տեղահանութեան, նոյն թշնամիի կողմէ այսօր Սուրիան եւս կ՛ենթարկուի նոյն վայրագութեան:
Այնուհետեւ դեսպան Փոլատեան, իր կարգին շնորհակալութիւն յատնեց Սուրիոյ հանրապետութեան Վսեմաշուք Նախագահ Պաշշար ալ-Ասատին, Արտգործ նախարարութեան եւ պետական այրերուն, իրենց ցուցաբերած վստահութեան եւ Սուրիոյ Հանրապետութեան առաջին աստիճանի արժանեաց շքանշանով պարգեւատրուելնուն համար:
Նշենք, որ դոկտ. փրոֆ. Արշակ Փոլատեան յուզմոնքով եւ հպարտանքի զգացումներով միախառն պահեր ապրեցաւ:
Նշենք, որ պարգեւատրման հանդիսութեան ներկայ էին Սուրիոյ արտգործ նախարարութեան բարձրաստիճան անձնաւորութիւններ, Հալէպի մէջ ՀՀ Գլխաւոր Հիւպատոս Արմէն Սարգսեան եւ Դամասկոսի մէջ ՀՀ դեսպանատան աշխատակազմը:
PERIO NEWS