Հովանաւորութեամբ Համազգայինի Լիբանանի Շրջանային վարչութեան երէկ` չորեքշաբթի, 14 նոյեմբեր 2018-ին, երեկոյեան ժամը 8:00-ին, «Յովհաննէս Պօղոսեան» թատերասրահին մէջ տեղի ունեցաւ «Խրիմեան Հայրիկ» մենաներկայացումը` հեղինակութեամբ, խաղարկութեամբ եւ բեմադրութեամբ գիտնական, թատերագիր, բանաստեղծ, թարգմանիչ, թատերագէտ, գրաքննադատ, բեմադրիչ, դերասան, խմբագիր, հասարակական գործիչ, դաստիարակ դոկտ. Հրանդ Մարգարեանի:
Համազգայինի Լիբանանի Շրջանային վարչութեան անունով Հուրի Զաքարեան բարի գալուստ մաղթելէ ետք ներկաներուն յայտնեց, որ սոյն մենաթատրոնը սփիւռքի ներկայ պայմաններուն մէջ պատահականօրէն ընտրուած նիւթ մը չէ` նկատի ունենալով, որ ան կ՛անդրադառնայ ազգային զարթօնքին, որուն այնքան կարիքը ունինք այսօր Հայաստանի եւ սփիւռքի մէջ:
«Խրիմեան Հայրիկ» մենաներկայացումը կը պատմէ լաւատես, խրոխտ եւ անսասան հաւատքով անձնաւորութեան` Խրիմեան Հայրիկի ծնունդէն մինչեւ վախճանումը երկարող տարիներուն մասին: Այն Հայրիկին, որուն պատգամները այժմէական են ու կը մնան միշտ դաստիարակիչ` յաջորդ սերունդներուն համար: Ներկայացման ընթացքին հանդիսատեսը առիթը ունեցաւ առնչուելու Խրիմեան Հայրիկի հոգեւոր եւ ազգային կեանքի զանազան փուլերուն հետ, լսեց անոր կուռ հաւատքի դրսեւորումները, յորդորներն ու քաջ որոշումները:
Մենաներկայացման իրենց մասնակցութիւնը բերին Համազգայինի Մելանքթոն եւ Հայկ Արսլանեան ճեմարանի աշակերտները, որոնց Խրիմեան Հայրիկը ներկայացման ընթացքին յորդորեց կառչած մնալու հայրենիքին, մշակոյթին, հաւատքին, հայ ընտանիքին եւ յատկապէս հողին: