ԵՐԵՒԱՆ, «Ազատութիւն».- 26 Օգոստոսին, Երեւան հակադարձեց Պաքուի պնդումներուն, թէ ղարաբաղեան վերջին պատերազմէն ետք Մինսքի խումբը այլեւս ընելիք չունի:
«ԵԱՀԿ Մինսկի խմբի համանախագահութիւնն ունի միջազգային մանդատ (յանձնառութիւն)`աջակցելու Լեռնային Ղարաբաղի հակամարտութեան տեւական ու համապարփակ կարգաւորմանը, եւ այս մանդատը որեւէ մէկը չի չեղարկել», արձագանգելով Պաքուէն հնչած կոշտ արձագանգին` «Ազատութեան» հետ ունեցած զրոյցին ընթացքին յայտարարեց Հայաստանի արտաքին գործոց նախարարութեան բանբեր Վահան Յունանեան:
Միջնորդական խումբին շուրջ բանավէճը դարձեալ օրակարգ եկաւ 25 Օգոստոսին, երբ Միացեալ Նահանգներու արտաքին գործոց նախարար Էնթընի Պլինքըն դեսպան Ֆիլիփ Ռիքըրը նշանակեց կովկասեան բանակցութիւններու գծով աւագ խորհրդական եւ ԵԱՀԿի Մինսքի խմբակի համանախագահ՝ ընդգծելով. «Միացեալ Նահանգները յանձնառու է օգնելու Հայաստանին եւ Ատրպէյճանին բանակցելու Արցախի հակամարտութեան երկարաժամկէտ քաղաքական կարգաւորման շուրջ»:
Ատրպէյճանի արտաքին գործոց նախարարութիւնը Պլինքընի յայտարարութիւնը որակեցին «տարածաշրջանին մէջ ստեղծուած յետ-հակամարտութեան իրողութիւններէն հեռու մօտեցում»՝ յայտարարելով, որ «Ղարաբաղեան հակամարտութիւնը լուծուած է», նոյնիսկ սպառնալով, թէ գրեթէ չգործող Մինսքի խումբը «վերակենդանացնելու փորձերով» Ամերիկա կրնայ դուրս մնալ հայ-ատրպէյճանական յարաբերութիւններու կարգաւորման գործընթացէն:
Ժամեր ետք, առանց լեզուակռիւի մէջ մտնելու, Ուաշիկթընէն վերահաստատեցին, թէ դեսպան Ռիքըրի նշանակումով՝ իրենք «յանձնառու են նպաստելու Հայաստանի ու Ատրպէյճանի միջեւ ուղիղ երկխօսութեան` երկկողմ եւ բազմակողմ ձեւաչափերով` հասնելու երկու երկիրներուն միջեւ համապարփակ խաղաղ կարգաւորման»:
Յայտնենք, որ ԵԱՀԿի Մինսքի խումբի ամերիկացի նոր համանախագահը` Ֆիլիփ Ռիքըրը Միացեալ Նահանգներու արտաքին գործոց նախարարութեան Եւրոպական եւ եւրասիական հարցերու օգնականի նախկին պաշտօնակատար էր եւ նախորդ տարուան տարածաշրջանային այցելութեան ընթացքին «Ազատութեան» հետ ունեցած զրոյցին ընթացքին ըսած էր, որ պէտք է վերադառնալ ԵԱՀԿի Մինսքի խումբի գործընթացին: