Լէյլաւանի Մէջ «Գարակէօզեան» Հաստատութեան Ատամնաբուժարանի Հաստատման Առիթով
Լէյլաւանի մէջ «Գարակէօզեան» հաստատութեան ատամնաբուժարանի հաստատման առիթով, հինգշաբթի, 7 ապրիլ 2022-ին, կէսօրուան ժամը 12:00-ին, Ֆանար այցելեց ՀՅԴ Լիբանանի Կեդրոնական կոմիտէի եւ Հայկական երեսփոխանական պլոքի ներկայացուցիչ, երեսփոխան Յակոբ Բագրատունի: Հանդիպումին ներկայ էին Լիբանանի հայոց թեմի Ազգային վարչութեան փոխատենապետ, նախկին նախարար Վարդինէ Օհանեան-Գէորգեան, «Գարակէօզեան» հաստատութեան տնօրէն Սերոբ Օհանեան, ՀՅԴ «Է. Ակնունի» կոմիտէի ներկայացուցիչ Րաֆֆի Տէմիրճեան եւ Ս. Երրորդութիւն մատրան հոգեւոր հովիւ Միքայէլ քհնյ. Տէմիրճեան:
ՀՅԴ «Է. Ակնունի» ակումբին մէջ Բագրատունի գնահատեց անցնող տարիներուն Լէյլաւանի մէջ «Գարակէօզեան» հաստատութեան բեղուն աշխատանքը` մաղթելով, որ յառաջիկային առաւել եւս կը ճիւղաւորուին աշխատանքները: Ան նշեց, որ ծառայողական-առողջապահական աշխատանքներուն մէջ ատամնաբուժարանը էական բաժանմունք է, որ յառաջիկային մեծապէս պիտի նպաստէ շրջանի կարիքներուն: Բագրատունի շեշտեց, որ «Գարակէօզեան» հաստատութիւնը լիբանանահայ իրականութեան մէջ ունի իր ուրոյն տեղն ու դերը, եւ անոր ներդրումը այսօրուան տագնապալի օրերուն առաւել եւս կարեւոր է: Հայկական երեսփոխանական պլոքի ներկայացուցիչը շեշտեց, որ գաղութը կը պահպանուի հաստատութիւններով, որոնք հիմնուած են հաւաքական-ազգային շահերու տրամաբանութեամբ եւ որոնք իրենց ծառայութիւնները կը կատարեն առանց փոխադարձ ակնկալութիւններու, այլ` միմիայն մարդասիրական-բարեսիրական նպատակադրումներով:
Իր կարգին, «Գարակէօզեան» հաստատութեան տնօրէն Սերոբ Օհանեան ըսաւ, որ Լէյլաւանը «Գարակէօզեան» հաստատութեան համար իր իւրայատուկ տեղն ու կարեւորութիւնը ունի, որովհետեւ կը կրէ Լէյլա Գարակէօզեանի անունը: Ան նշեց, որ շրջանի կոմիտէին հետ անցեալին արդէն իսկ բազմաթիւ աշխատանքներ իրականացած են, եւ գալիք ամիսներուն կը ներկայացուին նոր ծրագիրները, որոնցմէ մէկն է Լէյլաւանի երկրորդ ամառնային դպրոցի կազմակերպումը: Օհանեան հաստատեց, որ ատամնաբուժարանը հաստատուած է Ճափոնի դեսպանատան նիւթական ներդրումով, եւ բաժանմունքը պիտի գործէ շաբաթական չորս օրերու ընթացքին, երկու ատամնաբուժներու հսկողութեամբ: Սերոբ Օհանեան հաստատեց, որ շրջանի կոմիտէին գործակցութիւնն ու արհեստավարժ վերաբերմունքը կը նպաստեն, որ շրջանին մէջ աշխատանքները ունենան հեզասահ եւ արդիւնաւոր ընթացք:
Ապա ներկաները այցելեցին «Գարակէօզեան» դարմանատուն` մօտէն ծանօթանալու կեդրոնի գործունէութեան եւ ի մասնաւորի ատամնաբուժական բաժանմունքին: Յայտնենք, որ ատամնաբուժարանի կողքին, շաբաթական երկօրեայ դրութեամբ դարմանատուն կ՛այցելեն ընդհանուր մասնագիտութեամբ երկու բժիշկներ` հետեւելու շրջանի հայորդիներու առողջապահական վիճակին, ըստ կարիքի կատարելու հայորդիներու բնակարաններու այցելութիւններ եւ մատուցելու համապատասխան ծառայութիւններ: