ԵՐԵՎԱՆ, 15 ԴԵԿՏԵՄԲԵՐԻ, ԱՐՄԵՆՊՐԵՍ: Հայաստանի վարչապետ Նիկոլ Փաշինյանը վերահաստատում է Հայաստանի պատրաստակամությունը՝ իրականացնել նոյեմբերի 9-ի եռակողմ հայտարարության 9-րդ կետի դրույթները, որը տարածաշրջանի տնտեսական և տրանսպորտային կապերի ապաշրջափակման մասին է. վարչապետը շեշտում է, որ եռակողմ հայտարարությունն այս գործընթացում ՀՀ սուվերենության որևէ սահմանափակում չի նախատեսում: «Արմենպրես»-ի փոխանցմամբ՝ այս մասին ՀՀ վարչապետ հայտարարեց կառավարության նիստում՝ անդրադառնալով ադրբեջանական վերջին սադրանքներին:
Նա նշեց, որ Ադրբեջանը շարունակաբար և կոպտորեն խախտում է եռակողմ հայտարարության նաև 9-րդ կետը՝ պնդելով, թե Հայաստանի Հանրապետությունը պետք է միջանցք տրամադրի: «Բազմիցս եմ ասել, որ Հայաստանի Հանրապետության տարածքով որևէ միջանցքի գոյություն 2020 թ. նոյեմբերի 9-ի եռակողմ հայտարարությունը չի նախատեսում: Նման բան չի նախատեսում նաև ՀՀ կողմից ստորագրված որևէ փաստաթուղթ: Բնականաբար անհեթեթ, նույնիսկ տգետ են բոլոր այն պնդումները, թե Հայաստանը բանավոր նման խոստում է տվել որևէ մեկին»,-վստահեցրեց Փաշինյանը:
Ինչպես նախկինում, այնպես էլ հիմա Հայաստանը պատրաստ է եռակողմ հայտարարության 9-րդ կետի դրույթների իրականացմանը, որը տարածաշրջանի տնտեսական և տրանսպորտային կապերի ապաշրջափակման մասին է: «Եվ, հետևաբար, Հայաստանը ցանկացած պահի պատրաստ է ճանապարհների վերաբացմանը, նոր ճանապարհների կառուցմանն ու շահագործմանը, ինչպես նախատեսված է ՀՀ օրենսդրությամբ»,-ասաց նա:
Վարչապետը նաև ընդգծեց, որ Ադրբեջանը կոպտորեն խախտում է նաև նոյեմբերի 9-ի եռակողմ հայտարարության 8-րդ կետը, որով ասվում է, որ պետք է տեղի ունենա ռազմագերիների, պատանդների և այլ պահվող անձանց փոխանակում:
«Ադրբեջանը մինչև այժմ պահում և հրաժարվում է Հայաստանին վերադարձնել առնվազն 33 գերիների, պատանդների և այլ պահվող անձանց, ինչը նույնպես ոչ միայն եռակողմ հայտարարության, այլ նաև հումանիտար իրավունքի կոպիտ խախտում է»,-ասաց Փաշինյանը: