Կիրակի, 11 Փետրուարին Երեւանի մէջ պիտի նշուի Բուն Բարեկենդանը: Տեղի պիտի ունենայ տօնական քայլերթ ու օրուան խորհուրդին նուիրուած այլ ձեռնարկներ:
Փետրուար 11-ին` ժամը 13:30-ին, Արարատեան Հայրապետական թեմի առաջնորդանիստ Սուրբ Սարգիս եկեղեցւոյ մէջ պիտի մեկնարկէ Բուն Բարեկենդանի տօնին նուիրուած տօնական քայլերթը, որուն մասնակիցները դիմակներով, երգ ու պարով, ձիակառքի եւ հեքիաթի հերոսներու ուղեկցութեամբ Մեսրոպ Մաշտոցի պողոտայով պիտի քալեն դէպի Ազատութեան հրապարակ:
Ազատութեան հրապարակին վրայ տեղի պիտի ունենայ օրուան խորհուրդին համապատասխան ձեռնարկը` ազգային երգ ու պարով, թատերական ներկայացումներով, կոխի ցուցադրութիւններով, խաղերով եւ մրցոյթներով, կը յայտնէ Երեւանի քաղաքապետարանի մամուլի ծառայութիւնը:
Բարեկենդանը, որ Հայ առաքելական եկեղեցւոյ շարժական տօներէն է, կը նշուի Սուրբ Սարգիսի տօնէն մինչեւ Մեծ պահք: Տօնը կ՛աւարտի Բուն Բարեկենդանով, որ կը նշուի շաբաթապահքերու եւ Մեծ պահքի նախընթաց Կիրակի օրը: Բարեկենդանին մարդիկ կը զուարճանան, կ՛երգեն, կը պարեն, ճոխ սեղաններ կը պատրաստեն, կը դիմակաւորուին, կը կազմակերպեն խաղեր եւ ներկայացումներ: Կը գործածեն յատկապէս իւղոտ ուտեստներ, մսեղէն եւ կաթնեղէն: