«ՓանԱրմինիըն» կը հաղորդէ, որ Ազրպէյճանի նախագահ Իլհամ Ալիեւ անգամ մը եւս սպառնալից ելոյթ մը ունեցաւ, այս անգամ` «Ենի Ազրպէյճան» կուսակցութեան համագումարին ընթացքին:
Արդարեւ, ան յայտարարեց. «Երեւանն ու Զանգեզուրը ազրպէյճանցիներու պատմական հողերն են», եւ դիմելով ազրպէյճանցի երիտասարդներուն` ըսաւ. «Կարելի չէ մոռնալ պատմական հողերը: Ատիկա պէտք է դառնայ մեր ապագայ գործունէութեան ուղղութիւնը»:
Ազրպէյճանի նախագահը աւելցուց, որ ապագային անհրաժեշտ է աւելի աշխուժ ըլլալ այդ հարցով եւ ձեռնարկներ իրականացնել աշխարհի տարբեր վայրերու մէջ, «որովհետեւ Երեւանն ու Զանգեզուրը մեր պատմական հողերն են, եւ ազրպէյճանցիները պէտք է վերադարձնեն այդ հողերը: Ատիկա՛ է մեր քաղաքական ու ռազմավարական նպատակը, եւ մենք պէտք է փուլ առ փուլ մօտենանք այդ նպատակին»:
Աւելի կանուխ, Հայաստանի արտաքին գործոց նախարար Էդուարդ Նալբանդեան, մեկնաբանելով Ազրպէյճանի նախագահին մէկ այլ արտառոց յայտարարութիւնը, թէ` Երեւանը 1918-ին հայերուն «նուիրուած» է ազրպէյճանցիներուն կողմէ, ըսած էր. «Աւելորդ չէր ըլլար կարելիութիւն տալ Ազրպէյճանի նախագահ Իլհամ Ալիեւին` մասնակցելու Երեւանի 2800-ամեակի տօնական ձեռնարկներուն: Ասիկա առաջին անգամը չէ, որ Պաքուէն նման յայտարարութիւններ կ՛ըլլան: Ասիկա գրեթէ մաս կը կազմէ նոյն այն շարքին, ուր կ՛ըսեն` Արցախն ալ պատմական Ազրպէյճանի տարածք է»: