ԵՐԵՒԱՆ, «Ազատութիւն».- Երեւան կը յուսայ, որ Մոսկուայի մէջ Ռուսիոյ եւ Ատրպէյճանի միջեւ ստորագրուած հռչակագիրը յաւելեալ կարելիութիւն պիտի ընձեռէ՝ յառաջ մղելու Հայաստանի, Ռուսիոյ եւ Ատրպէյճանի ղեկավարներուն կողմէ ընդունուած եռակողմանի յայտարարութիւններուն դրոյթներու իրականացումը: Հայաստանի արտաքին գործոց նախարարութեան խօսնակ Վահան Յունանեան դիտել տուաւ, որ ասիկա կրնայ նպաստել նաեւ ԵԱՀԿ Մինսքի խումբի համանախագահութեան հովանիին տակ Արցախի հակամարտութեան տեւական եւ համապարփակ կարգաւորման:
«Հայաստանի եւ Ռուսաստանի միջեւ հաստատուած միջպետական դաշնակցային համագործակցութիւնը, որը հիմնուած է ժողովուրդների դարաւոր բարեկամութեան վրայ, իր բնոյթով ինքնաբաւ է եւ որեւէ կերպ պայմանաւորուած չէ երրորդ երկրների հետ յարաբերութիւններով, եթէ դրանք կողմերը չեն զարգացնում ի վնաս հայ-ռուսական դաշնակցութեան: Դրա մասին են վկայում նաեւ պատմութիւնն ու կնքուած փաստաթղթերը», յայտնեց ան` ի պատասխան այն հարցումին, թէ ի՞նչ դիրքորոշում ունի Հայաստանը հռչակագիրի ստորագրութեան վերաբերեալ:
Յունանեան աւելցուց, որ Երեւան ու Մոսկուա տարբեր մակարդակներու վրայ, որոնց կարգին՝ բարձր եւ բարձրագոյն, «հետեւողականօրէն քայլեր են ձեռնարկում յարաբերութիւնները թէ՛ երկկողմ, թէ՛ բազմակողմ ձեւաչափերում ընդլայնելու ուղղութեամբ` ի շահ երկու երկիրների զարգացման»:
Նշենք, որ 22 Փետրուարին Մոսկուայի մէջ Ռուսիոյ եւ Ատրպէյճանի ղեկավարներու ստորագրած 43 կէտէ բաղկացած փաստաթուղթին մէջ անդրադարձ կայ ռուս-ատրպէյճանական գործակցութեան առնչուող շարք մը հարցերուն, որոնց կարգին՝ ռազմական, քաղաքական, տնտեսական, առողջապահական ու մշակութային: