Եւրոպական խորհրդարանը հրատապ ընթացակարգով եւ ճնշող մեծամասնութեամբ Լեռնային Ղարաբաղի մէջ մշակութային ժառանգութեան ոչնչացման վերաբերեալ բանաձեւ որդեգրեց:
Մանրամասն անդրադառնալով խնդիրի էութեան` Եւրոպական խորհրդարանի լիագումար նիստի ընթացքին քննադատուեցաւ Արցախի մէջ հայկական պատմամշակութային ժառանգութեան դէմ Ազրպէյճանի յարձակողապաշտ քաղաքականութիւնը: Ազրպէյճանի կողմէ Արցախի մէջ մշակութային ժառանգութեան ոչնչացումը կը նկատուի իբրեւ այդ երկրին մէջ պետական մակարդակով տարուող, համակարգուած հայատեաց քաղաքականութեան բաղկացուցիչ մաս: Եւրոպական խորհրդարանին կողմէ որդեգրուած բանաձեւին մէջ առաջին անգամ կ՛օգտագործուի «արմենոֆոպիա» եզրը: Կը շեշտուի, որ մշակութային ժառանգութեան ոչնչացումէն բացի Ազրպէյճանի մէջ հայատեացութեան պետական քաղաքականութեան դրսեւորումներէն են նաեւ պատմութեան սրբագրումը, հայերու նկատմամբ բռնութեան փառաբանումը, Հայաստանի Հանրապետութեան նկատմամբ տարածքային պահանջները, ինչ որ կը վտանգէ Հարաւային Կովկասի մէջ խաղաղութիւնը եւ կը խաթարէ անվտանգութիւնը:
Եւրոպական խորհրդարանը կը քննադատէ Ազրպէյճանի ծաւալապաշտական, ռազմատենչ քաղաքականութիւնը եւ Ազրպէյճանին կոչ կ՛ուղղէ հրաժարելու առաւելապաշտական նկրտումներէն: Բանաձեւին մէջ նաեւ կը շեշտուի, որ Լեռնային Ղարաբաղի վերջնական կարգավիճակի հարցը տակաւին լուծուած չէ, եւ որ անիկա պէտք է յստակացուի ԵԱՀԿ-ի Մինսքի խմբակի ծիրին մէջ:
Եւրոպական խորհրդարանը Ազրպէյճանէն կը պահանջէ ԵՈՒՆԵՍՔՕ-ին անյապաղ արտօնել իրականացնել իր առաքելութիւնը տեղւոյն վրայ` խորհրդակցելով նաեւ հայ մասնագէտներու հետ, եւ կ՛առաջարկէ օգտագործել Եւրոպական Միութեան արբանեակային կարելիութիւնները` փաստերը արձանագրելու համար: Կը նշուի, որ Լեռնային Ղարաբաղի մէջ հայկական մշակութային ժառանգութեան հետքերու վերացումը տեղի կ՛ունենայ ո՛չ միայն կոթողները ոչնչացնելով եւ անոնց վնասելով, այլ նաեւ պատմութիւնը կեղծելով եւ փորձելով զանոնք ներկայացնել իբրեւ այսպէս կոչուած Կովկասեան Ալպանիոյ ժառանգութիւն: Այս ծիրին մէջ կը նշուի Ազրպէյճանի մշակոյթի նախարարութեան կողմէ այս տարուան փետրուարին աշխատանքային խումբի ստեղծման մասին, որուն նպատակը պատմութեան սրբագրումն է:
Անդրադառնալով Եւրոպական խորհրդարանի բանաձեւին` Եւրոպայի Հայ դատի գրասենեակի նախագահ Գասպար Կարապետեան շեշտեց. «Վերջին ամիսներուն եւրոպացի երեսփոխաններու հետ տարուող անդադրում եւ նպատակաուղղուած իրազեկման աշխատանքը թէ՛ Պրիւքսելի մէջ Հայաստանի Հանրապետութեան դեսպանատան, թէ՛ Եւրոպայի Հայ դատի գրասենեակին կողմէ տուին իրենց արդիւնքը: Ատոր նպաստեց նաեւ Արցախի արտաքին գործոց նախարար Դաւիթ Բաբայեանի այցելութիւնը Պրիւքսել, Եւրոպական խորհրդարանին մէջ փետրուար ամսուան ընթացքին Արցախի հետ բարեկամութեան խումբի վերակազմութիւնը, ինչպէս նաեւ յունուարին Հայաստանի Հանրապետութեան մարդկային իրաւանց նախկին պաշտպան Արման Թաթոյեանի այցելութիւնը Պրիւքսել»:
«Փաստ է, որ Եւրոպական խորհրդարանը խստօրէն կը դատապարտէ Ազրպէյճանի մէջ պետական մակարդակով տարուող հայատեաց քաղաքականութիւնը: Ասիկա կարեւոր լծակ է Ազրպէյճանի վրայ ճնշում գործադրելու եւ այդ երկրի բարբարոսական քաղաքականութեան վերաբերեալ բարձրաձայնելու համար», ամփոփեց Գասպար Կարապետեան: