Ռուսիա պատրաստ է յառաջիկային կազմակերպելու հայ-ազրպէյճանական սահմանի սահմանազատման եւ սահմանագծման յանձնախումբի երկրորդ հանդիպումը: «Թերթ» կը հաղորդէ, որ այս մասին մամլոյ ասուլիսի ընթացքին յայտնած է Ռուսիոյ արտաքին գործոց նախարարութեան բանբեր Մարիա Զախարովա:
«Հայ-ազրպէյճանական սահմանի սահմանազատման եւ սահմանագծման յանձնախումբի գործունէութիւնը որեւէ ձեւով առնչուած չէ Ռուսիոյ խաղաղապահներու պատասխանատուութեան գօտիին մէջ գտնուող Լեռնային Ղարաբաղի Ասկերանի շրջանի գիւղերէն մէկուն շուրջ ստեղծուած կացութեան հետ», ըսած է ան` անդրադառնալով Արցախի Փառուխ գիւղին շուրջ ստեղծուած կացութեան:
«Միեւնոյն ժամանակ յոյս ունինք, որ գործարկումն ու համակարգուած աշխատանքը պիտի նպաստեն Պաքուի եւ Երեւանի միջեւ վստահութեան բարձրացման ու միջադէպերու կանխարգիլման, թէ՛ հայ-ազրպէյճանական սահմանին վրայ, թէ՛ ալ Ռուսիոյ խաղաղապահներու պատասխանատուութեան գօտիին մէջ», ըսած է Ռուսիոյ արտաքին գործոց նախարարութեան բանբերը:
Զախարովա նշած է, որ այժմ հանդիպումի թուականի հետ կապուած առաջարկներ կը սպասուին Հայաստանէն ու Ռուսիայէն:
«Արմէնփրես»-ի համաձայն, Զախարովա յայտարարած է, որ Ռուսիոյ արտաքին գործոց նախարար Սերկէյ Լաւրով 23-24 յունիսին աշխատանքային այցելութեամբ պիտի մեկնի Ազրպէյճան, ուր կ՛ակնկալուին Լաւրովի հանդիպումները Ազրպէյճանի արտաքին գործոց նախարար Ճէյհուն Պայրամովի եւ նախագահ Իլհամ Ալիեւի հետ:
«Կ՛ակնկալուի քննարկել երկկողմանի յարաբերութիւններու հետագայ զարգացման առնչուող բոլոր հարցերը` համաձայն 22 փետրուարին Մոսկուայի մէջ Ռուսիոյ եւ Ազրպէյճանի նախագահներուն միջեւ ստորագրուած դաշնակցային համագործակցութեան հռչակագիրի կէտերուն», յայտնած է Զախարովա:
Ան նաեւ նշած է, որ նախարարները պիտի քննարկեն շրջանային ու միջազգային արդիական հարցեր, յատուկ ուշադրութիւն պիտի յատկացուի 9 նոյեմբեր 2020-ի, 11 յունուար եւ 26 նոյեմբեր 2021-ի բարձր մակարդակի եռակողմ համաձայնութիւններու կեանքի կոչման ընթացքին: