Ըստ «Արմէնփրէս»-ի, «Սփութնիք»-ի մէջ կազմակերպուած տեսակամուրջի մը ընթացքին Տումայի երեսփոխան Քոնսթանթին Զատուլին ըսած է, որ Ազրպէյճան չի կրնար ելլել այն փակուղիէն, որուն մէջ ինքզինք դրած է իր սեփական հռետորաբանութեամբ: Այդ երկիրը նման կերպով կ՛արգելափակէ Արցախի տագնապի խաղաղ լուծման հեռանկարը:
«Ես չեմ նախատեսեր, որ մօտակայ օրերուն լուրջ յառաջընթաց արձանագրուի Արցախի տագնապի լուծման հարցին մէջ: Կը կարծեմ, որ ատիկա երկարատեւ հոլովոյթ է: Ներկայիս գոյութիւն ունեցող տրամադրուածութեան, ներառեալ Ազրպէյճանի ղեկավարութեան մօտ առկայ տրամադրուածութեան պարագային, դժուար է նման բան ակնկալել», ընդգծեց Զատուլին: Ան նշեց, որ ինքն ու իր գործընկերները այս պահուս կ՛ակնկալեն, որ ապագային տագնապին մէջ նոր սուր պոռթկումներ ու ռազմական գործողութիւններ չվերսկսին, եւ արիւնահեղութիւն տեղի չունենայ: Անոր համոզումով` ատիկա ներկայիս ամէնէն կարեւոր դիրքորոշումն է, որ պէտք է պահել:
Անդրադառնալով Ռուսիոյ կողմէ Ազրպէյճանին զէնք վաճառելու փաստին` Ռուսիոյ խորհրդարանի անդամը ընդգծեց, որ ատիկա տեղի կ՛ունենայ այն պայմանով, որ տուեալ երկիրը զսպուածութիւն դրսեւորէ եւ զէնքը չօգտագործէ Արցախի տագնապի գօտիին մէջ: «Դժբախտաբար, այդ խոստումները Ազրպէյճանի կողմէ դրժուած են», հաստատեց Զատուլին: Ան աւելցուց, որ Հայաստանին զինամթերք մատակարարելով ` ռուսական կողմը որոշ չափով սրբագրած է թերութիւնը` պահպանելով հաւասարակշռութիւնը շրջանին մէջ:
Անոր համաձայն, ներկայիս ամէնէն կարեւորը հաւասարակշռութեան պահպանումն է, որպէսզի կողմերէն իւրաքանչիւրը գիտնայ, որ եթէ ձեռնարկէ յարձակումի, ապա ստիպուած է պատասխանատուութիւն կրելու:
«Ես Արցախը կը դիտեմ իբրեւ ինքնորոշուած տարածք, եւ հակում չունիմ մտածելու, որ անիկա որեւէ ատեն, որեւէ հանգամանքի պայմաններուն մէջ մաս կազմէ Ազրպէյճանի: Ատիկա, ըստ իս, դէպքերու զարգացման բացարձակ անկարելի տարբերակ է», նշեց երեսփոխանը:
Անդրադառնալով ազրպէյճանական լրատուամիջոցներու կողմէ շրջանառութեան մէջ դրուող հռետորաբանութեան` Զատուլին ընդգծեց, որ անոնց մէջ շատ յաճախ հնչող վիրաւորանքներն ու ծայրայեղ գնահատականները որեւէ կերպով չեն կրնար օգնել կողմերուն:
«Ազրպէյճանական լրատուամիջոցներու հռետորաբանութիւնը փոխանակ օգնելու` շատ աւելի կը թուլցնէ Ազրպէյճանի հեղինակութիւնը յաչս դուրսի աշխարհին: Ինչպէ՞ս կրնայ երկրին օգնել այն յայտնի փաստը, երբ Հունգարիոյ մէջ ՕԹԱՆ-ի ռազմափորձերու շրջանակին մէջ հայ գործընկերը կացինահարած ազրպէյճանցի սպան դարձուցին ազգային հերոս, ազատ արձակեցին եւ բարձրացուցին պաշտօնը: Նման մօտեցումի պարագային, ի՞նչ փոխըմբռնում կարելի է ակնկալել հայկական կողմէն», ըսաւ ան:
Անդրադառնալով ռուսական կողմի գործողութիւններուն` Զատուլին նշեց, որ Ռուսիա չի դադրիր Արցախի տագնապի նիւթով երկկողմանի եւ բազմակողմանի հանդիպումներ կազակերպելէ: «Այն, ինչ որ մենք այսօր կրնանք ընել, երկու կողմերը զինուորական գործողութիւններու վերսկսումէն հեռու պահելն է», ընդգծեց երեսփոխանը: