Ուքրանիոյ նախագահ Վոլոտիմիր Զելենսքին Ուքրանիոյ ժողովուրդին դէմ կը պատերազմի: Այս մասին «Սփութնիք» ձայնասփիւռի կայանէն յայտարարած է Ռուսիոյ արտաքին գործոց նախարարութեան բանբեր Մարիա Զախարովա:
Ան այս ձեւով մեկնաբանած է Ուքրանիոյ զինեալ ուժերուն կողմէ Տոնպասի, ինչպէս նաեւ Խերսոնի եւ Զափորոժիէի մարզերու խաղաղ բնակիչներու գնդակոծութիւնները:
«Ասիկա թշնամիի դէմ պատերազմ չէ, Ռուսիոյ դէմ պայքար չէ, այլ սեփական երկիրի հետ կռիւ է: Եթէ մինչեւ հիմա Քիեւի վարչակարգը քաղաքականապէս կ՛ոչնչացնէր Ուքրանիան, ֆիզիքապէս կ՛ոչնչացնէր Տոնպասի ժողովուրդը, ապա այսօր մարդոց ոչնչացումը տեղի կ՛ունենայ Ուքրանիոյ ամբողջ տարածքին մէջ», ըսած է Զախարովա` շեշտելով, որ Վոլոտիմիր Զելենսքի կը գործէ մեկնելով շահերէն այն ուժերուն, որոնք Ուքրանիոյ հետ որեւէ կապ չունին:
Ան նաեւ յայտնեց, որ Զելենսքի դիտումնաւոր կերպով շրջանառութեան մէջ կը դնէ ազգութեան նիւթը:
«Դուք հաւանաբար ուշադրութիւն դարձուցած էք Միացեալ Նահանգներու արտաքին գործոց նախարարութեան Ռուսիոյ մէջ Զելենսքիի նկատմամբ այլատեացական քաղաքականութիւն վարելու վերաբերեալ բացարձակապէս անընդունելի յայտարարութիւնը: Նախ եւ առաջ ատիկա սուտ է: Եւ պիտի ուզէի Միացեալ Նահանգներու արտաքին գործոց նախարարութեան գաղափարախօսներուն յիշեցնել, որ Զելենսքիի ազգութեան նիւթը մենք չենք սկսած շրջանառութեան մէջ դնել, ատիկա բացարձակապէս մեզ չի հետաքրքրեր: Զելենսքիի ազգութեան նիւթը սկսած է տարածել անձամբ ինք` ատիկա դիտումնաւոր կերպով ընելով եւ իր ազգութիւնը կապելով Ուքրանիոյ տարածքին մէջ այլատեացութեան եւ նոր նացիականութեան դրսեւորումներու յայտնուելուն կամ գոյութիւն ունենալու ենթադրեալ անկարելիութեան հետ, որովհետեւ մարդու մը մօտ ազգութեան գոյութիւնը չի կրնար բացառել պետութեան տարածքին մէջ խնդիրներու գոյութիւնը», նշած է Զախարովա` շեշտելով, որ Միացեալ Նահանգներ եւս պէտք է դադրին շահարկել այդ նիւթը:
«Միացեալ Նահանգներ պէտք է դադրին ազգութեան ու ազգութիւններու նիւթի իր շահարկումները` Ուքրանիոյ մէջ տիրող կացութեան ծիրին մէջ», աւելցուցած է Զախարովա: