Թուրքիոյ նախագահ Ռեճեփ Թայիփ Էրտողան դարձեալ իր միջնորդական ծառայութիւնները առաջարկած է Ռուսիոյ եւ Ուքրանիոյ: «Սփութնիք Արմենիա» կը հաղորդէ, որ այս մասին նշած է Թուրքիոյ նախագահի աշխատակազմի հանրային կապերու վարչութեան պետ Ֆահրեթթին Ալթուն:
«Մենք մեր շրջանին մէջ հերթական պատերազմի ականատեսն ենք: Նախագահ Էրտողան պատրաստ է իբրեւ միջնորդ հանդէս գալու Ռուսիոյ եւ Ուքրանիոյ միջեւ, որովհետեւ մենք երկու երկիրներուն հետ ամուր յարաբերութիւններ ունինք», «Թուիթըր»-ի վրայ գրած է Ալթուն:
Թուրք պաշտօնատարը գրած է, որ Անգարան «դիւանագիտական մակարդակով ամէն ինչ ըրած է, որ կանխարգիլէ ներկայ կացութիւնը»: Անոր համաձայն, ՄԱԿ-ի համակարգը բարեփոխելու մասին Թուրքիոյ կոչերը անտեսուած են, ու հիմա բոլորը տեսան ատոր սարսափելի հետեւանքները:
Ալթուն կը կարծէ, որ այս պատերազմէն կարելի էր խուսափիլ, եթէ Անգարայի կոչերը լսող ըլլար: «Մենք բազմիցս դիւանագիտական լուծման կոչ ուղղած ենք, սակայն հիմա պատերազմը մեր առջեւ կանգնած է իբրեւ իրականութիւն: Շրջանային ու համաշխարհային շարք մը հարցերու շուրջ միջազգային ընտանիքի միասնականութեան բացակայութիւնը լուրջ խնդիր էր, այդպէս է նաեւ ռուս-ուքրանական ճգնաժամի ժամանակ», նշած է Ալթուն:
Էրտողանի վարչակազմի ներկայացուցիչը նշած է, որ Թուրքիոյ քաղաքականութեան վերաբերեալ բազմաթիւ ենթադրութիւններ ու մեկնաբանութիւններ կան:
«Թուրքիոյ դիւանագիտական քայլերը եւ անոնց համակարգումը իր դաշնակիցներուն հետ միշտ ուղղուած են տագնապի արագ եւ խաղաղ լուծման: Թող ոչ ոք կասկածի ատոր: Թուրքիան կը հաւատայ իւրաքանչիւր ճգնաժամի մէջ դիւանագիտութեան կառուցողական ու ստեղծարար ուժին եւ կը փորձէ առաւելագոյնս օգտագործել բոլոր դիւանագիտական կարելիութիւնները», ըսած է Ալթուն:
Թուրքիոյ արտաքին գործոց նախարար Մեւլութ Չաւուշօղլու եւ անոր ռուս պաշտօնակից Սերկէյ Լաւրով հեռաձայնայնային հաղորդակցութեան մը ընթացքին քննարկած են Ուքրանիոյ մէջ տեղի ունեցած վերջին իրադարձութիւնները: Այս մասին ԹԱՍՍ լրատու գործակալութիւնը յայտնած է Թուրքիոյ արտաքին գործոց նախարարութենէն աղբիւր մը:
Չաւուշօղլու բանակցութիւններու համար միջնորդութիւն առաջարկած է: Ան մասնաւորաբար ըսած է, որ եթէ կողմերը ուզեն, Թուրքիան պատրաստ է Ռուսիոյ եւ Ուքրանիոյ միջեւ բանակցութիւններ կազմակերպելու:
Միւս կողմէ, «Երկիր» կը հաղորդէ, որ Չաւուշօղլու յայտարարած է. «Ռուսիոյ նախագահ Վլատիմիր Փութինի` ուքրանացի զինուորականներուն երկրին մէջ իշխանութիւնը իրենց ձեռքը առնելու կոչը տարակուսելի է եւ անընդունելի»:
«Մենք զարմացանք այս կոչէն, ատիկա սխալ եւ անընդունելի կոչ է», ըսած է ան:
Թրքական դիւանագիտութեան պետը նաեւ վստահեցուցած է, որ Անգարան պիտի շարունակէ խստօրէն կատարել Մոնթրէոյի հռչակագիրին բոլոր կէտերը եւ մտադիր չէ այդ հարցին մէջ հաւատարիմ մնալ երկակի չափանիշերու:
«Թուրքիան միշտ հաւատարիմ մնացած է այն համաձայնութիւններուն, որոնց կողմնակիցն է», ընդգծած է Չաւուշօղլու:
Ան նաեւ յայտնած է, որ Թուրքիան սկսած է Ուքրանիայէն ցամաքային ճամբով իր քաղաքացիներու հեռացման հոլովոյթը:
«ՌԻԱ Նովոսթի» կը հաղորդէ, որ Թուրքիոյ նախագահի գրասենեակը յայտնած է, թէ Թուրքիոյ նախագահ Ռեճեփ Թայիփ Էրտողան հեռաձայնային հաղորդակցութիւն ունեցած է Ուքրանիոյ նախագահ Վոլոտիմիր Զելենսքիի հետ:
«…Քննարկուած են Ուքրանիոյ մէջ Ռուսիոյ զինուորական միջամտութիւնն ու վերջին իրադարձութիւնները», նշած են գրասենեակէն` աւելցնելով. «Նախագահ Էրտողան յայտարարած է, թէ Անգարան ջանքեր կը գործադրէ, որպէսզի որքան կարելի է շուտ յայտարարէ զինադադար, որպէսզի կանխարգիլէ հետագայ մարդկային զոհերը եւ Ուքրանիոյ հասցուող հետագայ վնասը»:
Մինչ այդ, իսրայէլեան լրատուամիջոցներ հաղորդեցին, որ Ռուսիոյ նախագահ Վլատիմիր Փութին մերժած է Իսրայէլի վարչապետ Նաֆթալի Պենեթի` Ուքրանիոյ մէջ զինուորական գործողութիւնները դադրեցնելու միջնորդութիւն կատարելու առաջարկը:
Փութին Պենեթին յայտնած է, որ իր երկիրը պատրաստ է Պիելոռուսիոյ մէջ բանակցութիւններ կատարելու, սակայն Ուքրանիան առիթը չէ օգտագործած: