ԵՐԵՒԱՆ, «Արմէնփրէս».- 22 Դեկտեմբերին, Հայաստանի Հանրապետութեան Անվտանգութեան խորհուրդի քարտուղար Արմէն Գրիգորեան հանդիպում ունեցաւ Իրանի Իսլամական Հանրապետութեան խորհրդարանի Իրան-Հայաստան խորհրդարանական բարեկամական խումբի անդամներուն հետ: Լուրը կը հաղորդէ Հայաստանի Հանրապետութեան Անվտանգութեան խորհուրդի գրասենեակը:
Իրանի խորհրդարանի Ազգային անվտանգութեան եւ արտաքին քաղաքականութեան մնայուն յանձնախումբի անդամ Մահմուտ Ահմատի Պիղաշ կարեւոր նկատեց Իրանի համար Հարաւային Կովկասի դերը: Ան մասնաւորաբար ընդգծեց, որ շրջանային կայունութիւնը եւ ապահովութիւնը, սահմաններու անխախտելիութիւնը Իրանի համար կարմիր գիծեր են, եւ Թեհրան տարածաշրջանին մէջ որեւէ տարածքային փոփոխութիւն պիտի չհանդուրժէ:
Արմէն Գրիգորեան այս ծիրին մէջ նշեց Հայաստանի կարմիր գիծերը, ինչպէս նաեւ Հայաստանի կողմէ նախապէս առաջադրուած «խաղաղութեան դարաշրջան» սկսելու հրամայականը, որ նաեւ կը համընկնի Իրանի արտաքին քաղաքականութեան առաջնահերթութիւններուն հետ: Անվտանգութեան խորհուրդի քարտուղարը նաեւ կարեւոր նկատեց Երեւան-Նախիջեւան-Ճուլֆա երկաթուղագիծի գործարկումը՝ ընդգծելով, որ անիկա պիտի առաջնորդէ տարածաշրջանի երկիրներու տնտեսական զարգացման:
Հանդիպումին աւարտին, զրուցակիցները կարեւոր նկատեցին տարբեր ոլորտներու մէջ փոխադարձ գործակցութեան շարունակութիւնը: