ՈՒԱՇԻՆԿԹԸՆ.- «Ֆրիտըմ Հաուս» ամերիկեան իրաւապաշտպան կազմակերպութիւնը հրապարակեց մամլոյ ազատութեան նուիրուած իր տարեկան զեկոյցը, որուն մէջ կը շեշտուի, որ Թուրքիա դարձեալ «յաջողութեամբ չանցաւ քննութենէն»:
Զեկոյցին մէջ կը նշուի, որ մամուլի ազատութիւնը վերջին 13 տարիներուն զգալիօրէն նահանջած է Թուրքիոյ մէջ եւ անիկա այս տարի եւս կը գտնուի մամուլի ազատութեան ցանկին վրայ որեւէ յառաջխաղաց չարձանագրած երկիրներու ցանկին վրայ:
Մամլոյ ազատութիւնը ապահովելու հարցով համացանցի կարեւորութիւնը ընդգծող զեկոյցին մէջ, Թուրքիա դրուած է «մասամբ ազատ» երկիրներու ցանկին վրայ:
«Համացանցը կարեւոր տեղ կը զբաղեցնէ այն երկիրներուն մէջ, ուր մամուլի ազատութիւնը անսպասելիօրէն եւ սաստիկ կերպով կը սահմանափակուի: 2016-ի ռազմական յեղաշրջման փորձէն ետք, Թուրքիոյ մէջ փակուեցան առնուազն 150 լրատուամիջոցներ, իսկ հարիւրաւոր լրագրողներ անհիմն կերպով մեղադրուեցան ահաբեկչութեան աջակցելու յանցանքով: Այս բոլորին իբրեւ արդիւնք՝ լրագրողները տեղափոխուեցան դէպի համացանցային հարթակներ», կը նշուի զեկոյցին մէջ, ուր կը շեշտուի, թէ Անգարա իր կարգին սկսած է յաւելեալ ուշադրութիւն դարձնելու համացանցը եւս զսպելու ջանքերուն։
«Նահանջող ժողովրդավարութիւն» վերնագիրով Թուրքիոյ մասին զեկոյցը նկատել կու տայ, որ թրքական իշխանութիւնները նաեւ բռնութեանց կը դիմեն լրագրողներու դէմ:
Զեկոյցին մէջ անդրադարձ կատարուած է նաեւ արտայայտուելու ազատութեան եւ նշուած է, որ Թուրքիոյ մէջ միայն 2017-ին՝ երկրին ղեկավարը վիրաւորելու ամբաստանութեամբ սկսած են առաւել քան 20.000 հետաքննութիւններ, եւ առնուազն 6000 քաղաքացիներու դէմ դատեր բացուած են: