ԵՐԵՒԱՆ, «Երկիր»․- Թուրք դիւանագէտ, Հայաստանի հետ յարաբերութիւններու կարգաւորման հարցով Թուրքիոյ յատուկ ներկայացուցիչ եւ Միացեալ Նահանգներու մէջ Թուրքիոյ նախկին դեսպան Սերտար Քըլըճ պահանջեց, որ ՄԱԿի մէջ բարեփոխումներ կատարուին` նշելով, որ աշխարհը «հինգէն աւելի է», ակնարկելով ՄԱԿի Ապահովութեան խորհուրդի մնայուն անդամներուն թիւին։
Այս յայտարարութեամբ թուրք պաշտօնատարը պարզապէս կը վերաշարադրէ Թուրքիոյ` վերջին տարիներու պաշտօնական դիրքորոշումը, թէ ՄԱԿի Ապահովութեան խորհուրդի կազմը պէտք է ընդլայնել եւ Թուրքիան դարձնել մնայուն անդամ, որովհետեւ, ըստ թուրքերուն, «այսօրուան աշխարհը տարբեր է 1945 թուականին համեմատ, երբ կառոյցը կը ստեղծուէր»:
«Իւրաքանչիւր ճգնաժամ, որ կը պահանջէ ՄԱԿի Ապահովութեան խորհուրդէն վճռական քայլեր` ատոր վերջ տալու կամ ատոր հետեւանքով յառաջացած մարդասիրական աղէտը կանխարգիլելու համար, անգամ մը եւս կը վկայէ ՄԱԿի բարեփոխումներու անհրաժեշտութեան մասին, որ պէտք է արտացոլէ այն փաստը, որ աշխարհը հինգէն աւելի է», նշեց թուրք պաշտօնատարը: