ԵՐԵՒԱՆ, «Նիուզ».- Թուրքիոյ կառավարող Արդարութիւն եւ բարգաւաճում կուսակցութեան արտաքին յարաբերութիւններու գծով փոխնախագահ Էֆքան Ալան հաստատեց, որ Անգարայի եւ Երեւանի յարաբերութիւններու կարգաւորումը կապուած է Պաքուի եւ Երեւանի յարաբերութիւններուն հետ:
«Հայաստանի հետ յարաբերութիւններու լուծման գործընթացին մէջ մենք կը գործենք Ատրպէյճանի հետ համագործակցութեան ծիրին մէջ», յայտնեց ան:
Ըստ անոր՝ հանդիպումները Հայաստանի հետ յարաբերութիւններու կարգաւորման գործընթացի ծիրին մէջ, կը շարունակուին: «Տեղի ունեցան յատուկ ներկայացուցիչներու հանդիպումները: Մենք կը սպասենք յարաբերութիւներու բարելաւման: Յոյս ունիմ, որ միւս կողմը նոյնպէս նման նպատակադրում ունի: Ձեռք կը բերուին արդիւնքներ, որոնք օգտակար պիտի ըլլան ոչ միայն երկու երկիրներուն, այլ նաեւ տարածաշրջանի բոլոր պետութիւններուն համար», յայտնեց ան:
Խօսելով Թուրքիոյ եւ Ատրպէյճանի միջեւ յարաբերութիւններուն մասին՝ կուսակցութեան փոխնախագահը նշեց, որ «բոլորին խորհուրդ կը տրուի դասեր քաղել այդ եղբայրութենէն»: