Լիբանանեան ուժեր կուսակցութեան կազմակերպութեամբ երէկ երեկոյեան ժամը 5:30-ին, Մեհրապի մէջ տեղի ունեցաւ կուսակցութեան նահատակներուն յիշատակին նուիրուած տարեկան պատարագը:
Այս առիթով Լիբանանեան ուժեր կուսակցութեան ղեկավար Սամիր Ժահժահ արտասանեց ճառ մը, որուն մէջ իր խօսքը ուղղելով նահատակներուն յայտնեց, որ ոմանք կը վախնան անոնց զօրութենէն, հերոսութենէն եւ յանձնառութենէն:
«Օրին մենք ունէինք շրջաններ, որոնց համար նահատակուեցաք դուք եւ տասնեակ հազարաւոր լիբանանցիներ վիրաւորուեցան, որպէսզի այդ շրջանները մնան ազատ` հակառակ 1975-1990 երկարող բախումներուն եւ բռնագրաւումներուն», ըսաւ Ժահժահ:
Իր խօսքը ուղղելով լիբանանցիներուն` Ժահժահ շեշտեց. «Անոնք իրենց Լիբանանը ունին, իսկ մենք` մեր Լիբանանը: Անոնց Լիբանանը Դիմադրութեան առանցքի եւ անոր դաշնակիցներուն Լիբանանն է, որուն մէջ կ՛ապրինք այսօր: Իսկ մեր Լիբանանը այն Լիբանանն է, որուն օրերը մասամբ ապրեցանք Անկախութեան ինթիֆատայի օրերուն: Անոնց Լիբանանը քաոսի, քանդումի, աղքատութեան եւ անտիրութեան Լիբանանն է, իսկ մերը` օրէնքի, շինարարութեան, բարգաւաճման, քաղաքակրթութեան, բարօրութեան եւ պետութեան Լիբանանը»:
Ժահժահ շեշտեց, որ անոնց Լիբանանին մէջ բոլորին շահերը յարաբերական են, բացի` Հըզպալլայէն:
Ան աւելցուց, որ Հըզպալլա կը խանգարէ Լիբանանի կառավարութեան կազմութիւնը, իսկ այժմ կը պատրաստուի նախագահական ընտրութիւնը արգելակելու քայլին: «Իսկ այս քայլին կը դիմէ ոչ թէ բարեկարգչական որոշ ծրագիր մը իրականացնելու, այլ` փորձելու Ազգային ազատ հոսանք կուսակցութեան ղեկավար Ժըպրան Պասիլը եւ կամ «իրեն վստահուած անձ մը» հանրապետութեան նախագահ դարձնելու` նախագահ զօր. Միշել Աունը փոխարինելու նպատակով:
Ժահժահ նկատել տուաւ, որ ցաւալի է այն իրականութիւնը, որ անոնք կը յայտնեն, թէ գործած են քրիստոնեաներու իրաւունքները ապահովելու համար: «Այս մէկը մեծագոյն սուտն է, որովհետեւ անոնցմէ աւելի ոչ ոք վնաս հասցուց քրիստոնեաներու իրաւունքներուն, եւ ոչ ոք քրիստոնեաներուն արտագաղթը աւելի մեծ համեմատութեամբ կրցաւ իրականացնել, քան իրենք», ըսաւ ան:
Ժահժահ հաստատեց, որ իրենք պիտի չարտօնեն, որ Լիբանան առանձին մնայ` օտար ու լուսանցքայնացած եւ արաբական իր միջավայրէն ու միջազգային ընտանիքէն անջատուած: «Պիտի դիմադրենք բոլոր այն ծրագիրներուն, որոնք Լիբանանը կ՛առաջնորդեն դէպի այնպիսի վայրեր, որոնց նման չէ երկիրն ու անոր ժողովուրդը: Պիտի չարտօնենք, որ Լիբանանի պատմութիւնը խեղաթիւրուի, որպէսզի այս կամ այն կողմին գաղափարախօսութիւններուն եւ տեսութիւններուն պատշաճեցուի: Ոչ ոք իրաւունք ունի Լիբանանի իւրայատկութիւնները փոխելու», յայտնեց ան:
Ժահժահ շեշտեց, որ իրենք կը պահանջեն հանրապետութեան հզօր նախագահ մը, նոյնիսկ եթէ ոմանք կը կարծեն, թէ «Հզօր նախագահ»-ի վարկածը ձախողած է: «Հանրապետութեան ներկայ նախագահը ո՛չ միայն հզօր նախագահ չէ, այլեւ Լիբանանի պատմութեան ամէնէն տկար նախագահն է, որովհետեւ ան ենթարկուող է: Ան իր ժողովուրդն ու երկիրը զոհեց` իր անձնական շահերուն ծառայելու նպատակով», ըսաւ ան: