ՊԱՔՈՒ, ՄՈՍԿՈՒԱ.- Ատրպէյճանի մօտ Ռուսիոյ ժամանակաւոր հաւատարմատարը կանչուած է երկրի արտաքին գործոց նախարարութիւն, ուր անոր բողոքագիր մը յանձնուած է՝ երկրի ղեկավարութեան մասին Ռուսիոյ Ազատական ժողովդրավարական կուսակցութեան ղեկավար Վլատիմիր Ժիրինովսքիի «վիրաւորական» յայտարարութեան համար, կը գրէ «Մոսքովսքի Քոմսոմոլեց» թերթը:
Աղբիւրին բացատրութեամբ՝ խօսքը «Քոմսոմոլսքայա Փրաւտա» ձայնասփիւռի կայանէն քաղաքական գործիչին ունեցած խօսքին մասին է։ Անդրադառնալով Հայաստան-Ատրպէյճան սահմանին վրայ տիրող լարուած կացութեան՝ վերջինս ըսած էր. «Ռուսիա պէտք է վերադառնայ Ռուսական կայսրութեան եւ Խորհրդային Միութեան բոլոր տարածքները: Հարաւային Կովկասը մեր ազդեցութեան գօտին է»:
Որպէսզի ռուս զինուորներու տեղակայուած շրջաններուն մէջ զոհեր չարձանագրուին, Ժիրինովսքի կոչ ուղղած է Ատրպէյճանի նախագահ Իլհամ Ալիեւին՝ ըսելով. «Իլհամ, քու հայրդ իմաստուն մարդ էր, այդ իսկ պատճառով, դուն ունիս այն տարածքը։ Ոչ մէկ ռուս զինուորի ոչ ոք իրաւունք ունի նոյնիսկ ծուռ նայելու: Ինծի հասկցա՞ր, Իլհամ»:
Ապա Ժիրինովսքի աւելցուցած էր՝ ըսելով. «Ատրպէյճանի մէջ բռնապետութիւն կայ, եւ եթէ Պայտըն ուզէ, Ալիեւը գահընկէց պիտի ընէ երկու շաբթուան ընթացքին, եւ զայն պիտի կարենայ փրկել միայն Ռուսիան, ինչպէս փրկեց Փաշինեանը»: