ԵՐԵՒԱՆ, «Փանորամա».- Ա. Սպենդիարեանի անուան օփերայի եւ պալէի պետական ակադեմական թատրոնին մէջ տեղի ունեցաւ «Յովհաննէս Չեքիճեան` 60 տարի Հայաստանի ազգային ակադեմիական երգչախմբի հետ անբաժան» խորագիրով համերգը:
Համերգը կազմակերպուեցաւ՝ իբրեւ մեծարում Հայաստանի ազգային հերոս, ժողովրդական արուեստագէտ Յովհաննէս Չեքիճեանի՝ Հայաստանի ազգային ակադեմական երգչախումբը ղեկավարելու 60ամեակին: Այս տարիներուն երգչախումբը ամբողջ աշխարհի մէջ արաւել քան 1000 համերգ ունեցած է՝ դառնալով մեր հայրենիքի մշակութային դեսպանը:
Յովհ. Չեքիճեան շնորհակալութիւն յայտնեց հանդիսատեսներուն՝ միջոցառումը նկատելով պատմական երեւոյթ ոչ միայն Հայաստանի, այլ նաեւ աշխարհի համար:
«Իմ գործը հեշտ չի եղել, սակայն երբեք չեմ յուսահատուել: Այս ամէնին հասել եմ աշխատասիրութեամբ եւ յամառութեամբ», յայտնեց ան:
Համերգին ընթացքին ելոյթ ունեցաւ Հայաստանի ազգային ակադեմական երգչախումբը՝ Յովհաննէս Չեքիճեանի ղեկավարութեամբ: Գեղարուեստական ղեկավարին 60ամեայ գործունէութիւնը պատուեցին նաեւ Հայաստանի ազգային ֆիլհարմոնիք նուագախումբը, Երեւանի պետական կամերային, Մայր Աթոռ Սուրբ Էջմիածնի Նոր Նորքի հայորդեաց տան «Շողակաթ» մանկական, Եղուարդի արուեստի դպրոցի եւ Մ. Մալունցեանի անուան արուեստի դպրոցի երգչախումբերը, Վահագն Հայրապետեան (դաշնամուր), «Կադանս» եւ «Բարեկամութիւն» Հայաստանի պարարուեստի պետական համոյթները: