ԹԵՀՐԱՆ.- ՀՈՒՍԿի նախաձեռնութեամբ, 11 Յուլիսին, հաստատութեան կեդրոնին մէջ տեղի ունեցաւ «Թաւրիզէն Ստալինեան Կուլակ. Ընդհատուած Պատմութիւն» խորագիրը կրող գիրքի ներկայացումը:
Գիրքը կ՛անդրադառնայ «Ալիք»ի 1960-1971 թուականներու խմբագրապետ դոկտ. Պաղտիկ Մինասեանի կենսագրական տուեալներուն, որ իր կեանքի առաւել քան 10 տարիները անցուցած է Սիպերիա: Գիրքին հեղինակն է անոր դուստրը՝ դոկտ. Ռուբինա Մինասեան-Փիրումեան:
Հայ Դատի յանձնախմբի նախագահ Իսիկ Իւնանէսեան ելոյթ ունենալով՝ անդրադարձաւ դոկտ. Փիրումեանի կենսագրական տուեալներուն. ան «Եու. Սի. Էլ. Էյ.» համալսարանի դասախօս է եւ հեղինակած է Հայ Դատի եւ Հայոց Ցեղասպանութեան վերաբերեալ բազմաթիւ գիրքեր, դասագիրքեր եւ հետազօտական յօդուածներ:
Դոկտ. Փիրումեան իր ելոյթին ընթացքին ընդգծեց, որ միշտ պարտք համարած է իր հօր կենսագրութեան այդ դաժան տարիները պատկերելով՝ ներկայացնելով ստալինեան ոճրագործութիւնները հայ ժողովուրդին դէմ: Ան նկատել տուաւ, որ այդ մէկը իրեն համար հանդիսացած է մղիչ ուժ եւ 2017ին անգլերէնով հրատարակած է իր հօր յուշերը՝ «My father, A man of Courage and Perseferance, A Survivor of Stalin՛s GULAG» խորագիրով՝ աւելցնելով, որ գիրքի առաջին տարբերակը անգլերէնով տպագրելու դրդապատճառը այն էր, որ Սփիւռքը եւ մասնաւորաբար աշխարհը ծանօթանայ հայ ժողովուրդի դէմ իրականացած այդ ժամանակաշրջանի ոճրագործութիւններուն:
Հեղինակը կը նկարագրէ իր հօր կեանքը՝ մանկութենէն մինչեւ Չեկայի կողմէ անոր առեւանգումը, Թաւրիզէն աքսորը, առաւել քան 10 տարիներ բանտարկութեան մէջ մնալը, ապա՝ վերադարձը Իրան: Գիրքի երկու գլուխներուն մէջ կը գտնենք Պաղտիկ Մինասեանի անաւարտ յուշերը, զորս դոկտ. Փիրումեան ամբողջացուցած է:
Դոկտ. Փիրումեան ամփոփ կէտերու մէջ անդրադարձաւ նաեւ այն հանգամանքին, որ Հայաստան գտնուած ժամանակաշրջանին, երբ ներկայացուցած է գիրքը, առաջարկած են զայն թարգմանել հայերէնի, սակայն ինք քաջ գիտակցելով, որ հայ նոր սերունդը եւս պէտք է իրազեկ դառնայ այդ տարիներու պատմութեան՝ հեղինակած է գիրքի հայերէն տարբերակը, որ անգլերէնին հետ համեմատած՝ կը բովանդակէ յաւելեալ մանրամասնութիւններ:
Իւնանէսեան առաջարկեց, որ ՀՈՒՍԿի միջոցով գիրքը թարգմանուի պարսկերէնի եւ տպագրուի: Հեղինակը գոհունակութեամբ ընդառաջեց առաջարկին: