ՊԱՔՈՒ ԿԸ ՀԱԿԱԴԱՐՁԷ
ԵՐԵՒԱՆ․- Իրանի իշխանութիւնները Պաքուի իշխանութիւններուն փոխանցեցին, որ ատրպէյճանական ռազմական օդանաւերու՝ Իրանի օդային տարածքով թռիչքները արգիլուած են:
«Սփութնիք Արմէնիա»ն կը հաղորդէ, որ այս տեղեկութիւնը կը յայտնեն ատրպէյճանական լրատուամիջոցները եւ կ՛աւելցնեն, որ Ատրպէյճան Նախիջեւանի բանակին մատակարարումները կը կատարէ հիմնականին մէջ Իրանի օդային տարածքով:
Ատրպէյճանական լրատուամիջոցները նշեցին, որ Պաքու Թեհրանի այս քայլը որակած է իբրեւ Ատրպէյճանի նկատմամբ դաւաճանութիւն, որ որդեգրուած է Հայաստանի Հանրապետութեան կառավարութեան դրդումով՝ աւելցնելով, որ այս քայլը Ատրպէյճանին մասնաւոր վնաս պիտի չպատճառէ, որովհետեւ Ատրպէյճանի պաշտպանութեան նախարարութիւնը Նախիջեւանի մէջ տեղակայուած զօրամասերուն մատակարարման հարցին մէջ առաջնահերթութիւն տուած է այլ ուղիներուն:
Հակադարձելով իրանեան այս քայլին, Ատրպէյճանի մէջ փակուած է Իրանի գերագոյն հոգեւոր պետ այաթոլլա սէյիտ Ալի Խամենէիի ներկայացուցիչ՝ սէյիտ Ալի Աքպար Օճաղնեճատի գրասենեակը: «Թերթ»ը կը հաղորդէ, որ այս մասին կը յայտնեն ատրպէյճանական լրատուամիջոցները:
Ոստիկանութեան աշխատակիցներու մասնակցութեամբ՝ ստուգումներ կատարուած են Հուսէյնիա թաղամասին մէջ գտնուող մզկիթին մէջ, որուն համալիրին մէջ կը գտնուի նաեւ գրասենեակը, եւ պաշտամունքի վայրը փակուած է:
Ատրպէյճանի ներքին գործոց նախարարութեան ներկայացուցիչը յայտարարեց, որ յայտնի դարձած է է, որ վերջին օրերուն քաղաքի կարգ մը վայրերու մէջ «Քորոնա» ժահրով վարակուած մարդոց թիւը աւելցած է: Ըստ անոր՝ այդ վայրերէն մէկը նշեալ մզկիթն է եւ այդ պատճառով մզկիթը փակուած է: