Եւրոպական Միութեան արտաքին քաղաքականութեան պատասխանատու Ճոզեփ Պորել երէկ ըսած է, որ այս շաբաթ Միացեալ Նահանգներու կողմէ դրական պատասխան կ՛ակնկալէ Եւրոպական Միութեան առաջարկին, որ ուղղուած է 2015-ի Իրանի հիւլէական համաձայնագիրի` Գործողութիւններու միացեալ համապարփակ ծրագիրի փրկման: Այս մասին հաղորդեց «Ռոյթըրզ» լրատու գործակալութիւնը:
Պորել նաեւ նշած է, որ Իրան ողջամիտ պատասխան տուած է առաջարկին, որ հետեւած է 16-ամսեայ դանդաղ, անուղղակի ամերիկա-իրանեան բանակցութիւններուն, որոնց մէջ Եւրոպական Միութիւնը համագործակցած է կողմերուն հետ: Առաջարկին բովանդակութիւնը չէ հրապարակուած:
«Իմ կողմէ, իբրեւ բանակցութիւններու համակարգող, առաջարկ եղաւ: Ասիկա այն հաւասարակշռութիւնն է, որուն մենք հասած ենք, ես չեմ կարծեր, որ մենք կրնանք այս կամ այն կողմէն բարելաւել զայն… Եւ Իրանէն եղաւ պատասխան, որ ես ողջամիտ կը նկատեմ», ըսած է Պորել` սպանական Սանթանտեր քաղաքին մէջ համալսարանական ձեռնարկի մը ժամանակ:
«Անիկա ներկայացուած է Միացեալ Նահանգներուն, որ տակաւին պաշտօնական պատասխան չէ տուած… Յոյսով եմ, որ պատասխանը վերջ պիտի դնէ բանակցութիւններուն», աւելցուցած է ան:
Պորել նախապէս ըսած էր, որ այդ առաջարկը դաշինքի «վերջնական առաջարկն» է` համաձայնագիրը երկարաձգելու համար, որ կասեցուած էր 2018 թուականին Միացեալ Նահանգներու նախկին նախագահ Տանըլտ Թրամփի վարչակազմին կողմէ: