Հանրապետութեան նախագահ զօր. Միշել Աուն երէկ պատկերասփռուած ճառ մը արտասանեց Իրաքի պետութեան հիմնադրութեան հարիւրամեակին առիթով կազմակերպուած ձեռնարկին ընթացքին:
Նախագահ Աուն անդրադարձաւ Լիբանանի եւ Իրաքի երկկողմանի եղբայրական յարաբերութիւններուն` նշելով միաժամանակ, որ Մեծն Լիբանանի յայտարարութեան եւ իրաքեան յեղափոխութեան միջեւ միայն մէկ տարուան տարբերութիւն կայ, նշելով միաժամանակ, որ զոյգ պետութիւնները նոյն տեսակի դժուարութիւններ դիմագրաւած են, յատկապէս` տնտեսական եւ ապահովական առումով:
Նախագահ Աուն շնորհակալութիւն յայտնեց իրաքցիներուն, որոնք միշտ նեցուկ կը կանգնին Լիբանանին եւ լիբանանցիներուն, հակառակ անոնց դիմագրաւած մարտահրաւէրներուն: Ան բարձր գնահատեց իրաքցի պատասխանատուներուն կողմէ Լիբանանին նաւթ տրամադրելու նախաձեռնութիւնը, որպէսզի կարելի ըլլայ բանեցնել ելեկտրակայանները:
Նախագահ Աուն ողջունեց Իրաքի նախագահ Պարհամ Սալեհը, վարչապետ Մուսթաֆա Քազիմին, ինչպէս նաեւ այս նախաձեռնութեան պատասխանատուները` մաղթելով, որ Լիբանանին տրամադրուելիք իրաքեան նաւթին շնորհիւ կարելի կ՛ըլլայ հոգալ լիբանանցիներուն կարիքները եւ թեթեւցնել ժողովուրդին բեռը:
«Համոզուած եմ, որ Իրաք պիտի կարենայ վերականգնել իր փառքի օրերը, ինչպէս նաեւ աշխուժացնել իր ժողովուրդին ներուժը` նուաճելու համար այս դարու բարձրագոյն դիրքերը եւ իրականացնելու լուրջ բարգաւաճում», հաստատեց ան:
Իր կարգին, Լիբանանի մէջ Իրաքի դեսպան Հայտար Շայահ Պարրաք յայտնեց, որ Իրաք էր եւ կը մնայ միջազգային սկզբունքներու եւ ուխտերու յանձնառու երկիր մը, որ նեցուկ կը կանգնի իր արաբ բոլոր եղբայրներուն, որոնց շարքին` Լիբանանին, որուն հետ կը բաժնէ միացեալ պատմութիւն եւ ճակատագիր: