Ռուսիոյ արտաքին գործոց նախարար Սերկէյ Լաւրով յայտարարեց. «Ուքրանիոյ մէջ ռուսական զինուորական գործողութեան աշխարհագրական առաքելութիւնը փոխուեցաւ եւ այլեւս Տոնեցքով ու Լուկանսքով սահմանափակուած չէ»:
«Այժմ, (մեր) աշխարհագրութիւնը տարբեր է: Միայն Տոնեցքի ժողովրդական հանրապետութիւնը եւ Լուկանսքի ժողովրդական հանրապետութիւնը չէ, անիկա նաեւ Խերսոնի շրջանը, Զափորիժիա շրջանը եւ շարք մը այլ տարածքներ են», «ՌԻԱ Նովոսթի»-ի եւ «Ռաշա Թուտէյ»-ի հետ հարցազրոյցի ընթացքին ըսաւ ռուսական դիւանագիտութեան պետը:
Ան յայտնեց, որ Ռուսիան չի կրնար ընդունիլ, որ «Ուքրանիոյ որոշ հատուածներուն մէջ, որոնք Զելենսքիի կամ զինք փոխարինող անձի մը վերահսկողութեան տակ պիտի ըլլան, գոյութիւն ունին զէնքեր, որոնք ուղղակի սպառնալիք կը ներկայացնեն մեր տարածքին կամ (արեւելեան Ուքրանիոյ) տարածքին այդ հանրապետութիւններուն դէմ, որոնք անկախութիւն հռչակած են», ըսաւ ան` աւելցնելով. «Եթէ Արեւմուտքը շարունակէ Քիեւին հեռահար զէնքեր մատակարարել, ապա Ուքրանիոյ մէջ մեր զինուորական գործողութիւններուն թիրախները ատկէ աւելի հեռու պիտի երթան»:
Միացեալ Նահանգներ անցեալ ամիս Ուքրանիոյ մատակարարած էր ՀԻՄԱՐԶ միջին հասողութեամբ հրթիռային համակարգեր, որոնք Ուքրանիոյ արտօնած էին ճակատէն աւելի հեռու եղող ռուսական դիրքերու դէմ աւելի յաճախակի կերպով յարձակում գործեն:
Լաւրով նախքան այդ յայտարարած էր. «Միացեալ Նահանգներն ու Բրիտանիան Ուքրանիան զինելով Ռուսիան ու Եւրոպան դէպի բախում կը մղեն»:
«Ուքրանիոյ արգիլուած է որեւէ շինիչ քայլ կատարել, եւ անոր առիթ պիտի չտրուի Ռուսիոյ հետ բանակցելու», ըսած էր ան:
«Պրիւքսելին (Եւրոպական Միութեան) պարտադրած պայմանները սկսան Եւրոպական Միութեան անդամ երկիրներուն առջեւ արգելքներ պատճառել», յայտնած էր ռուսական դիւանագիտութեան պետը: