Ռուսիոյ Տուման լիագումար նիստի ընթացքին միաձայնութեամբ վաւերացուցած է չորս միջազգային համաձայնագիրի Տոնեցքի եւ Լուկանսքի ժողովրդային Հանրապետութիւնները, ինչպէս նաեւ Խերսոնի եւ Զափորոժիէի մարզերը Ռուսիոյ կազմին մէջ ընդունելու վերաբերեալ:
Յիշեցնենք, որ 30 սեպտեմբերին Ռուսիոյ նախագահ Վլատիմիր Փութին Քրեմլինի Գէորգիեւեան դահլիճին մէջ ստորագրած է նշեալ շրջաններու Ռուսիոյ կազմին մէջ ներառման եւ Ռուսիոյ կազմին մէջ նոր շրջաններու ձեւաւորման մասին համաձայնագիրները:
ԹԱՍՍ լրատու գործակալութիւնը կը հաղորդէ, որ Ռուսիոյ արտաքին գործոց նախարար Սերկէյ Լաւրով Տումայի լիագումար նիստին ընթացքին իր արտասանած խօսքին մէջ յայտնած է, թէ այս տարածքներուն Ռուսիոյ դաշնակցութեան կազմին մէջ ներառումը դարձած է ռուսական հողերու վերամիաւորման տրամաբանական շարունակութիւնը:
«Ուքրանիոյ զինեալ ուժերը անպատիժ կը սպաննէին Տոնպասի բնակիչները, միայն այն պատճառով, որ անոնք մերժած են աջակցիլ նոր նացիական վարչակարգին: Քիեւի կողմէ մարդոց կեանքին սպառնացող աճող սպառնալիքները անկարելի դարձուցած են Տոնպասի ժողովրդային հանրապետութեան, Լուկանսքի ժողովրդային հանրապետութեան, Խերսոնի եւ Զափորոժիէի մարզերու Ուքրանիոյ կազմին մէջ գոյութիւնը», ըսած է Լաւրով:
Խօսելով Միացեալ Նահանգներու մասին` ռուսական դիւանագիտութեան պետը ըսած է, որ Ռուսիան, ի տարբերութիւն Միացեալ Նահանգներուն, կ՛արձագանգէ ոչ թէ հեռաւոր երկիրներու երեւակայական սպառնալիքներուն, այլ իր սահմաններուն վրայ գտնուող իրական սպառնալիքներուն:
«Միացեալ Նահանգներ կը գործեն այնպէս, ինչպէս Հիթլերը ժամանակին կը գործէր Խորհրդային Միութեան դէմ` հպատակեցնելով Արեւմուտքը` Ուքրանիան Ռուսիոյ հետ պատերազմի գործիք դարձնելու համար», ըսած է Ռուսիոյ արտաքին գործոց նախարարը: