Իսրայէլի վարչապետ Եայիր Լափիտ յայտարարեց. «Թուրքիոյ նախագահ Ռեճեփ Թայիփ Էրտողանի հետ զրոյցէս ետք, Իսրայէլ եւ Թուրքիա որոշեցին դեսպաններն ու ընդհանուր հիւպատոսները վերադարձնել»:
«Թուրքիոյ հետ յարաբերութիւններու վերանորոգումը շրջանային կայունութեան համար կարեւոր ներուժ է, ինչպէս նաեւ տնտեսապէս շատ կարեւոր Իսրայէլի քաղաքացիներուն համար, եւ պիտի շարունակենք աշխարհի վրայ Իսրայէլի միջազգային դիրքերու ամրապնդման աշխատանքը», ըսաւ Լափիտ:
Ան ընկերային ցանցի վրայ յայտարարութեան մը մէջ յայտնեց. «Երէկ գիշեր Իսրայէլի արտաքին գործոց նախարարութեան ընդհանուր տնօրէն Ալոն Ուշփից զրուցեց Թուրքիոյ արտաքին գործոց փոխնախարար Սետաթ Էօնալի հետ, եւ երկուքը յանգեցան Իսրայէլի եւ Թուրքիոյ միջեւ յարաբերութիւնները անգամ մը եւս ամբողջական դիւանագիտական ներկայացուցչական մակարդակի բարձրացնելու եւ երկու երկիրներու դեսպաններն ու ընդհանուր հիւպատոսները վերադարձնելու որոշումին»:
Յիշեցնենք, որ երկու երկիրներուն միջեւ յարաբերութիւնները սառեցուած էին 2010-ին, երբ Կազայի իսրայէլեան պաշարումը խզել փորձող տորմիղի մը մաս կազմող թրքական «Մաւի Մարմարա» նաւը իսրայէլեան ծովուժին կողմէ յարձակումի ենթարկուեցաւ: Յարձակումին պատճառով 10 թուրքեր մահացան: