Լեռնային Ղարաբաղի տագնապը երբեք սառեցուած չէ, անիկա իսկական տագնապ է, որ ազդեցութիւն ունի հայ հասարակութեան, կառավարութեան եւ պետութեան վրայ: «Արմէնփրես»-ի համաձայն, իր տեսակէտը լրագրողներու հետ զրոյցի ընթացքին ըսած է Հայաստանի մէջ Ֆրանսայի դեսպան Ժոնաթան Լաքոթ:
«Այն երկու ամիսներուն, որ ես Հայաստանի մէջ եմ, շփման գիծին վրայ եղած են զինուորներու մահուան դէպքեր: Ասիկա տագնապ մըն է, որ մեզ կը մտահոգէ, եւ կ՛երեւի, որ ատիկա է պատճառը, որ Ֆրանսան վճռականօրէն լծուած է այն աշխատանքին, որ պիտի տանի լուծման` հիմք ընդունելով ուժ չկիրարկելու սկզբունքը, որովհետեւ այս տագնապը զինուորական լուծում չի կրնար ունենալ, միւս կողմէ` տարածքային ամբողջականութեան եւ ազգերու ինքնորոշման իրաւունքի սկզբունքները, որոնք բանակցային բուն հոլովոյթի առանցքներն են: Ֆրանսա իր վճռականութիւնը յայտնած է` լիակատար կերպով իրականացնելու այն յանձնառութիւնները, զորս ստանձնած է ԵԱՀԿ-ի Մինսքի խմբակի կազմին մէջ», ըսաւ Ֆրանսայի դեսպանը»:
Ըստ անոր, ասիկա տագնապի լուծման հիմնաքարն է, որ Ֆրանսայի մէջ ղեկավարութեան բարձրագոյն մակարդակով կը փնտռեն, սակայն բանակցուած եւ տեւական լուծում գտնելու որոշումը կը պատկանի երկու կողմերուն:
Դեսպանը նաեւ յայտնեց, որ Հայաստան-Եւրոպական Միութիւն համաձայնագիրի ստորագրութիւնը պատմական իրադարձութիւն է: «Պէտք է յստակօրէն գիտակցիլ, որ այդ համաձայնագիրը իր ձեւով եզակի փաստաթուղթ է, որովհետեւ այսօրուան դրութեամբ անիկա միակ համաձայնագիրն է, որ ստորագրուած է ԵԱՀԿ-ի անդամի մը կողմէ, որ կրնայ ունենալ առանձնաշնորհեալ յարաբերութիւններ Եւրոպական Միութեան հետ», նշեց Լաքոթ` ընդգծելով, որ համաձայնագիրը նորանոր հեռանկարներ կը բանայ Հայաստանի առջեւ եւ կու տայ շարք մը առաւելութիւններ:
Անոր համաձայն, փոփոխութիւնները մէկ անգամէն չէ, որ պէտք է զգացուին, սակայն համաձայնագիրը երաշխիք է առ այն, որ Հայաստանի մէջ գործադրուող բարեփոխումները կը համապատասխանեն եւրոպական չափանիշներուն:
«Բնականաբար, ասիկա Հայաստանի համար շատ մեծ պատասխանատուութիւն է, որովհետեւ համաձայնագիրին ստորագրումով այդ բարեփոխումները կարելիութիւն կու տան մօտենալու եւրոպական չափանիշներուն, պետութիւնը կը մղեն ձեռնարկելու բարեփոխումներ: Իսկ Եւրոպական Միութեան անդամ պետութիւնները քաջ կը գիտակցին այդ բարեփոխումներուն կարեւորութիւնը, որ Հայաստանը ստանձնած է», ըսած է ան:
Լաքոթ ընդգծեց, որ Հայաստանը իր բազմաշառաւիղ քաղաքականութեան շնորհիւ կրնայ շատ կարեւոր օղակ հանդիսանալ շրջանին մէջ: Անոր համաձայն, Հայաստանի մէջ հաստատուած ֆրանսական ընկերութիւններուն համար չափազանց կարեւոր է Եւրասիական տնտեսական միութեան շուկայի հասանելիութիւնը:
«Եւ այս առումով Հայաստան կը ստանձնէ կապող օղակի, կամուրջի դեր», նշեց Ժոնաթան Լաքոթ եւ աւելցուց, որ ներդրողին համար կարեւոր են նաեւ իրանեան շուկայի հաւանական կարելիութիւնները»: