Մինչ Սէուտական Արաբիոյ տնտեսութեան եւ առեւտուրի պալատներու նախագահ Աժլան Աժլան կոչ ուղղեց սէուտցի գործարարներուն եւ սէուտական ընկերութիւններուն կասեցնելու Լիբանանի հետ առեւտրական եւ տնտեսական գործունէութիւնը: Ֆրանսա կոչ կ՛ուղղէ Ծոցի երկիրներուն Լիբանանը չմեկուսացնելու` դիւանագիտական տարակարծութեան մը պատճառով:
Ֆրանսայի արտաքին գործոց նախարար Ժան Իվ Լը Տըրիան յայտնեց, որ Փարիզ ամէն ջանք ի գործ կը դնէ` Լիբանանի եւ արաբական երկիրներուն միջեւ ստեղծուած տագնապը լուծելու:
Լը Տըրիան կոչ ուղղեց բոլոր կողմերուն, ինչպէս նաեւ լիբանանցի պատասխանատուներուն` ամրապնդելու երկխօսութիւնը` ի խնդիր լիբանանցի ժողովուրդին եւ Լիբանանի կայունութեան:
Լը Տըրիան ընդգծեց, որ Լիբանանի եւ Ծոցի երկիրներուն միջեւ դիւանագիտական տագնապին լուծումը վճռական է Շրջանին համար:
«Լիբանանը շրջանային տագնապներէ զերծ կացուցելը հիմնական կարեւորութիւն կը ներկայացնէ: Լիբանան պէտք է կարելիութիւն ունենայ շրջանային իր բոլոր գործընկերներուն վստահելու, որպէսզի զօրակցին անոր` բարեկարգումները գործադրելու մէջ», ըսաւ ան:
Մ«Տի ինտիփենտընթ» օրաթերթին համաձայն, Ֆրանսա անհրաժեշտ կը նկատէ, որ Ծոցի երկիրները չմեկուսացնեն Լիբանանը, որովհետեւ անիկա կը սպառնայ Լիբանանը ելեւմտական լուրջ սպառնալիքներու ենթակայ դարձնել, յատկապէս նկատի ունենալով այն իրականութիւնը, որ լիբանանեան շուկան կ’ապաւինի իր արտադրութիւնները Ծոցի երկիրներ արտածելու վրայ, ինչպէս նաեւ լիբանանցիները մեծ յոյսեր կը կապեն այդ երկիրներուն մէջ աշխատող իրենց հարազատներուն կատարելիք նիւթական փոխանցումներուն վրայ: