Երէկ կէս գիշերէն լ Լիբանան պաշտօնապէս թեւակոխեց նախագահական դատարկութեան փուլ, որովհետեւ աւարտեցաւ հանրապետութեան նախագահ զօր. Միշել Աունի վեցամեայ նստաշրջանը :
Տակաւին քանի մը օր առաջ պատմական նուաճում մը իրագործուած ըլլալու նշոյլները չըմբոշխնած, լիբանանցին արդէն իսկ մուտք գործեց քաղաքական նոր տագնապ մը, որուն շրջագիծին մէջ կան հարցականներ, նախագահական դատարկութի՞ւն է ստեղծուածը, թէ՞ սահմանադրական:
Այս հարցականները կը վերաբերին երկրին կառավարութեան օրինական չըլլալուն եւ նախագահ Աունի կողմէ անոր հրաժարականը ընդունած ըլլալու մասին շրջանառութեան մէջ դրուող լուրերուն ու մեկնաբանութիւններուն:
Սպասելով հինգշաբթի, 3 նոյեմբեր 2022-ի խորհրդարանի նիստին, որուն ընթացքին խորհրդարանին մէջ պիտի ընթերցուի նախագահ Աունի նամակը, երկիրը կը մնայ անորոշ եւ քաղաքական դատարկ իրավիճակի մէջ:
Նշենք, որ նամակը կը վերաբերի հանրապետութեան նախագահին լիազօրութիւնները կառավարութեան փոխանցելու նախագահ Աունի մերժումին:
Միւս կողմէ, նախագահական ընտրութեան առումով համախոհութիւն գոյացնելու կամ քաղաքական ուժերուն միջեւ խորհրդակցութիւն կատարելու որոշ միտում մը կայ, իսկ կառավարութիւնը մետասաներորդ պահուն կազմելու մասին յոյսերն ու նշոյլները ի դերեւ ելան այն պահուն, երբ նախագահ Աուն յայտարարեց, թէ ինք կառավարութեան հրաժարականը ստորագրած է:
Մինչ երկիրը կրնայ ուղղուիլ դէպի քաղաքական յաւելեալ լուրջ քաոս մը, նախագահ Աուն երէկ ընդունեց Ֆրանսախօս երկիրներու կազմակերպութեան ընդհանուր քարտուղար Լուիզ Մուշիքիուապոն:
Հանդիպումին ընթացքին նախագահ Աուն յայտնեց, որ Ֆրանսախօս երկիրներու կազմակերպութեան Միջին Արեւելքի կեդրոնը Լիբանանը ընտրելը ինքնին վստահութեան նշան է եւ հաստատում մը Լիբանանի ունեցած մշակութային եւ քաղաքակրթական դերակատարութեան` շրջանին եւ աշխարհին մէջ: