Հարաւային Լիբանանի եւ Իսրայէլի միջեւ ծովային սահմանագծումի անուղղակի բանակցութիւններուն հսկող ամերիկացի բանագնաց Էյմըս Հոքշթայն` ընկերակցութեամբ Լիբանանի մէջ Միացեալ Նահանգներու դեսպան Տորըթի Շիայի, երէկ առաւօտեան այցելեց հանրապետութեան նախագահ զօր. Միշել Աունի:
Հանդիպումին ներկայ գտնուեցան նաեւ Ընդհանուր ապահովութեան ընդհանուր տնօրէն հազարապետ-զօրավար Ապպաս Իպրահիմ եւ խորհրդարանի փոխնախագահ Էլիաս Պու Սաապ:
Շուրջ քառասուն վայրկեան տեւած հանդիպումէն ետք Հոքշթայն մեկնեցաւ առանց յայտարարութիւն կատարելու:
Նշենք սակայն, որ Պաապտայի մէջ տեղի ունեցած հանդիպումին ընթացքին նախագահ Աուն շեշտեց իր ջուրերուն եւ անոնց մէջ գտնուող բնական հարստութիւններուն առումով Լիբանանի գերիշխանական իրաւունքը եւ Հոքշթայնին ներկայացուց Լիբանանի պատասխանը` ամիս մը առաջ ստացուած ամերիկեան առաջարկին:
Նախագահ Աուն ամերիկացի բանագնացէն պահանջեց կարելի եղածին չափ արագ վերադառնալ Լիբանան` իրեն հետ ունենալով իսրայէլեան կողմին պատասխանը:
Հոքշթայն շնորհակալութիւն յայտնեց նախագահ Աունին` անոր պատասխանին համար, եւ խոստացաւ այդ մասին քննարկումներ կատարել իսրայէլեան կողմին հետ` ծովային սահմանագծումի անուղղակի բանակցութիւններուն շրջագիծին մէջ:
Կէսօրէ ետք ժամը 1:30-ին Հոքշթայն այցելեց խորհրդարանի նախագահ Նեպիհ Պըրրիի: Ներկայ գտնուեցաւ նաեւ դեսպան Շիա:
Աւելի քան մէկ ժամ տեւած հանդիպումին ընթացքին Պըրրի Հոքշթայնին յայտնեց, թէ ծովային սահմանագծումի մասին հանրապետութեան նախագահին փոխանցումը, որ կեդրոնացած է Լիբանանի իրաւունքները պահպանելու եւ լիբանանեան ջուրերուն մէջ գտնուող բնական հարստութենէն օգտուելու վրայ, կը ներկայացնէ այն կեցուածքը, որուն շուրջ բոլոր լիբանանցիները համաձայն են:
«Խորհրդակցութիւնները կեդրոնացան էական հարցին վրայ, որն է ծովային սահմանագծումը, որուն պարագային հիմնականը կը մնայ շրջագիծի համաձայնութիւնը. անիկա կը նկատուի անուղղակի բանակցութեան լաւագոյն ձեւը եւ կ՛երաշխաւորէ հանդիպումներուն շարունակութիւնը, մինչեւ որ կարելի ըլլայ արդիւնքներու յանգիլ: Ասիկա անշուշտ պէտք չէ պատճառ դառնայ, որ Լիբանան իր նաւթահորը պեղելու եւ հորատելու իրաւունքը կորսնցնէ, յատկապէս նկատի ունենալով, որ ան թիւ 9 նաւթահորը նուազուրդի ենթարկած է: Հետեւաբար Լիբանանը հորատելու իր իրաւունքէն արգիլելը համաձայնութեան խախտում կը նկատուի եւ Լիբանանը իր իրաւունքներէն կը զրկէ, մինչդեռ անիկա կ՛արտօնէ իսրայէլեան գոյացութեան` հորատելու նաւթահորերը եւ բռնարարքներ կատարելու: Այս իրականութիւնը շրջանին խաղաղութիւնը կրնայ խախտել եւ կացութիւնը վտանգի ենթարկել», յայտնեց Պըրրի:
Ան աւելցուց նաեւ, որ իր հարստութիւնը հորատելու յանձնառու Լիբանանը յանձնառու կը մնայ նաեւ երկրին ապահովական կայունութեան:
Հոքշթայն այցելեց նաեւ վարչապետարան` ընկերակցութեամբ Շիայի, Իպրահիմի եւ Պու Սաապի:
Վարչապետի պաշտօնակատար Նեժիպ Միքաթի Հոքշթայնին ներկայացուց ծովային սահմանագծումին մասին լիբանանեան միացեալ կեցուածքը եւ այս իմաստով ամերիկացի միջնորդին աշխատանքը շարունակելու Լիբանանի յանձնառութիւնը:
Հանդիպումին ընթացքին հաստատուեցաւ, որ Լիբանանի գերագոյն շահերը կ՛ենթադրեն նաւթահորերու պեղում կատարել` առանց հրաժարելու Լիբանանի բնական հարստութեան իրաւունքէն:
Ապա ամերիկացի բանագնացը ուղղուեցաւ արտաքին գործոց եւ արտերկրի լիբանանցիներու հարցերու նախարարի պաշտօնակատար Ապտալլա Պու Հապիպի հետ հանդիպում մը ունենալու:
Պու Հապիպ Հոքշթայնի հետ հանդիպումը դրական նկատեց` հաստատելով սահմանագծումի յանգելու կարեւորութիւնը:
Պու Հապիպ ընդգծեց, որ ամերիկացի բանագնացին մօտ շօշափած է սահմանագծումի հասնելու տրամադրութիւնը:
Հոքշթայն այցելեց Եարզէ, ուր հանդիպում մը ունեցաւ լիբանանեան բանակի հրամանատար զօր. Ժոզեֆ Աունի հետ: Քննարկուեցան Լիբանան-Իսրայէլ ծովային սահմանագծումին վերաբերող հարցեր:
Հանդիպումին ընթացքին զօր. Աուն վերահաստատեց, որ բանակը կը զօրակցի որեւէ որոշումի, որ կը տրուի քաղաքական իշխանութեան կողմէ, ինչպէս նաեւ որեւէ սահմանագիծի, որ կը ծառայէ Լիբանանի շահերուն:
Հոքշթայն հանդիպում մը ունեցաւ նաեւ բարեկարգչական երեսփոխանները ներկայացնող պատուիրակութեան մը հետ:
Նշենք, որ երէկ կէսօրին Հոքշթայն եւ անոր ընկերակցող պատուիրակութիւնը շրջեցան Ժմմեյզէի փողոցներուն մէջ, իսկ նախանցեալ գիշեր ան հանդիպում մը ունեցած էր Պու Սաապի հետ: Հանդիպումը դրական նկատուած էր:
Երեկոյեան «Հուրրա» պատկերասփիւռի արբանեակային կայանին հետ իր ունեցած հարցազրոյցին ընթացքին Հոքշթայն հաստատեց, որ Լիբանան իր այցելութիւնը նոր շրջագիծ մըն է` լսելու համար Լիբանանի կառավարութեան:
Հոքշթայն հաստատեց, որ աւետիսը այն է, որ իր ներկայացուցած առաջարկին մասին լիբանանեան համախոհութիւն շօշափած է` աւելցնելով, որ Լիբանան ներկայացուցած է այնպիսի միտքեր, որոնք կրնան հիմք ծառայել բանակցութիւնները շարունակելու եւ յառաջընթաց արձանագրելու:
Հոքշթայն նախընտրեց լուռ մնալ եւ չբացայայտել լիբանանեան իշխանութիւններուն կողմէ ներկայացուած միտքերն ու առաջարկները` աւելցնելով, որ բանակցութիւնները կը գտնուին գերզգայուն փուլի մը մէջ: «Կը կարծեմ, որ Լիբանանի եւ Իսրայէլի միջեւ սահմանագծումին շուրջ համաձայնութիւնը շատ կարեւոր է զոյգ երկիրներուն համար: Նախքան ստացած առաջարկներուս բացայայտումը, զանոնք պիտի ներկայացնեմ իսրայէլեան կողմին, եւ ըստ այնմ պիտի շարունակենք առանցքը», հաստատեց ան:
ՄԻՒՍ կողմէ, Իսրայէլի վարչապետ Նեֆթալի Պենեթ երէկուան իր յայտարարութեան մէջ ցաւ յայտնեց, որ լիբանանեան իշխանութիւնները զբաղած են ներքին հարցերով եւ տարակարծութիւններով` իրենց քաղաքացիներուն համար կազ հորատելու փոխարէն: