ՍՏԵՓԱՆԱԿԵՐՏ.- Արցախի Հանրապետութեան արտաքին գործոց նախարարութիւնը կը հաղորդէ, թէ 5 Նոյեմբերին տարածուած է Լոս Անճելըսի քաղաքապետական խորհուրդի բանաձեւը՝ Արցախի ազատագրական շարժումին 30ամեակին վերաբերեալ, որ վաւերացուեցաւ խորհուրդին 7 Սեպտեմբերի նիստին ընթացքին: Ստորեւ կը ներկայացնենք սոյն բանաձեւին ոչ-պաշտօնական թարգմանութիւնը.
«Նկատի ունենալով, որ Լոս Անճելըսը հպարտ է նշելու Արցախի ազատագրական շարժման 30րդ տարեդարձը, ինչպէս նաեւ՝
Նկատի ունենալով, որ 30 տարի առաջ՝ Փետրուար 1988ին, բռնապետութեան պայմաններու մէջ Արցախի ժողովուրդը իր ձայնը բարձրացուցած էր յանուն ինքնորոշման, ազատութեան եւ ժողովրդավարութեան, ինչպէս նաեւ՝
Նկատի ունենալով, որ Ստեփանակերտէն մինչեւ Երեւան մարդիկ համախմբուած են յանուն ազատութեան եւ ինքնիշխանութեան ու ընդդէմ անհանդուրժողականութեան եւ օտար տիրապետութեան, ինչպէս նաեւ՝
Նկատի ունենալով, որ 10 Դեկտեմբեր 1991ին տեղի ունեցած հանրաքուէին իբրեւ արդիւնք Արցախի Հանրապետութիւնը հռչակած է իր անկախութիւնը, ինչպէս նաեւ՝
Նկատի ունենալով, որ վերջին երեք տասնամեակներուն ընթացքին Արցախի Հանրապետութեան ժողովուրդը տոկունութիւն եւ հաստատակամութիւն ցուցաբերած է պատերազմի, կոտորածներու, տնտեսական զրկանքներու եւ այլ հսկայական դժուարութիւններու հանդէպ,
Որոշեցինք, որ Լոս Անճելըսը իր լաւագոյն բարեմաղթանքները յղէ Արցախի Հանրապետութեան եւ անոր քաղաքացիներուն, յանուն՝ խաղաղութեան, բարգաւաճման եւ շարունակական յաջողութեան եւ կոչ կ՛ընէ միջազգային հանրութեան՝ որ լիարժէք կերպով ճանչնայ Արցախի Հանրապետութիւնը՝ որպէս ազատ, անկախ եւ ինքնիշխան պետութիւն»: