Պուրճ Համուտի քաղաքապետութիւնը դարձեալ կը դիմէ շրջանի ընտանիքներուն եւ բնակիչներուն` անոնց յիշեցնելու համար հետեւեալը.
– Մօտ երեք տասնամեակներէ ի վեր, պետութեան իրերայաջորդ կառավարութեանց որոշումով, շրջանի աղբակոյտերու հաւաքումն ու փողոցներու մաքրութիւնը ստանձնած են Բարգաւաճման եւ վերակառուցման խորհուրդին հետ պայմանագրուած մասնագիտացած ընկերութիւններ:
– Պուրճ Համուտի եւ մերձակայ քաղաքապետութեանց պարագային, նշեալ ընկերութիւնը «Ռամքօ» հաստատութիւնն էր, որ արտակարգ պայմաններու բերումով հարկադրաբար քանի մը ամիսներ դադրեցուց իր աշխատանքը: Այդ միջոցին, Պուրճ Համուտի քաղաքապետութիւնը ջանաց աղբակոյտերու հաւաքումն ու փողոցներու մաքրութիւնը կատարել իր տրամադրութեան տակ գտնուող կարելի միջոցներով ու սահմանափակ մարդուժով, որ բաւարար չէր այդ աշխատանքը կատարելու կանոնաւոր կերպով, հետեւաբար աղբերը երկար ատեն մնացին փողոցներուն մէջ, կուտակուած վիճակով:
– Քաղաքապետութիւնը նախապէս տեղեկացուցած էր բնակիչները, թէ «Ռամքօ» ընկերութիւնը վերսկսած է իր կանոնաւոր աշխատանքին` ընթացիկ ամսուան սկիզբէն ի վեր: Կը նկատենք, թէ արդէն իսկ աղբակոյտերուն մօտ 70 առ հարիւրը վերացած է փողոցներէն ու կ՛ակնկալենք, որ աղբերու հաւաքման ու մաքրութեան այս աշխատանքը ամբողջանայ նախքան ընթացիկ յունիս ամսուան վերջաւորութիւնը:
– Արդ, նշեալ ընկերութեան աշխատանքին վերսկսումով կը յուսանք, որ աղբերու վերացման եւ փողոցներու ընդհանուր մաքրութեան աշխատանքը վերադառնայ իր նախկին բնականոն դրութեան:
Այս առիթով կը վերյիշեցնենք նախապէս հրապարակած մեր կոչերն ու հաղորդագրութիւնները, յատկապէս` հետեւեալը.
1- Կոչ կ՛ուղղենք պահպանելու ընդհանուր մաքրութիւնը եւ յարգելու աղբահաւաքման փոխադրակառքերու ժամանման ժամերը, ձեր աղբերը չշպրտելու ասդին-անդին եւ աղբերու պարկերը ամուր գոցուած վիճակով զետեղելու ճշդուած տեղերը, որպէսզի չերկարի անոնց կուտակումն ու տարածումը փողոցներուն մէջ:
2- Տեղեակ պահել քաղաքապետութիւնը` հեռաձայնելով 01/260155 հեռախօսի թիւին եւ կամ` նկարելով ընդհանուր մաքրութեան սկզբունքները անտեսող ապօրինի քայլերը եւ քաղաքապետութեան յանձնել այդ նկարները, որպէսզի կարելի ըլլայ այդ հարցերը հետապնդել օրինական միջոցներով, յատկապէս` հետեւեալ պարագաներուն.
Երբ կը նկատէք փոխադրակառքերու եւ փոքր ինքնաշարժներու շրջան մուտքն ու աղբերու թափօնները պատահականօրէն աջ ու ձախ շպրտելը:
Երբ կը նկատէք մարդիկ, որոնք աղբակոյտերու մէջ փնտռտուքի լծուած` թափօններու պարունակած աղբերը անհոգութեամբ կը շպրտեն փողոցներուն եւ մայթերուն վրայ:
Ընդհանուր մաքրութեան պահպանումը հասարակաց պատասխանատուութիւն է թափօններու վերացման ու փողոցներու մաքրութեան աշխատանքը ստանձնած` պետական ու սեփական մարզերու պատկան մարմիններուն եւ մաքրութեան վսեմ ու քաղաքակիրթ այս աշխատանքը կատարելու յանձնառու` շրջանի բնակիչներուն միջեւ:
Նշեալ այս կողմերուն միջեւ գործակցութիւնը աւելի քան անհրաժեշտ է ներկայ պայմաններուն մէջ:
Վստահ ենք, որ համերաշխութեամբ ու գործակցութեամբ պիտի կարենանք հարթել տագնապները եւ բարելաւել ընդհանուր իրավիճակը:
ՊՈՒՐՃ ՀԱՄՈՒՏԻ ՔԱՂԱՔԱՊԵՏ
ՄԱՐՏԻԿ ՊՕՂՈՍԵԱՆ