«Ազդակ»-ի նախաձեռնութեամբ եւ Գալուստ Կիւլպէնկեան հիմնարկութեան հայկական բաժանմունքին աջակցութեամբ ընթացող լրագրութեան վարժողական ծրագիրը շարունակուեցաւ երէկ երեկոյեան, խմբագրատունէն դուրս, Պիքֆայայի մէջ:
«Ապագայ լրագրող»-ներու ծրագիրին անդամները այցելեցին Մեծի Տանն Կիլիկիոյ կաթողիկոսութեան դպրեվանք` ծանօթանալու դպրեվանքին աշխատանքներուն, ինչպէս նաեւ անոր կառոյցին եւ ջամբած հոգեւոր ու ազգային դաստիարակութեան:
Դպրեվանքի տեսուչ Պարոյր վրդ. Շերնէզեան դիմաւորեց Ապագայ լրագրողները, որոնց կատարեալ հարազատութեամբ ներկայացուց դպրեվանքի առաքելութիւնը, դպրեվանեցիներու առօրեան, կրթական ծրագիրը, հոգեւորին կողքին ազգայինով թրծելու պատասխանատուութիւնը:
Ապագայ լրագրողներուն ուղղած հարցումներով, դպրեվանքի տեսուչին հետ հանդիպումը վերածուեցաւ մտերմիկ զրոյցի մը, որուն ընթացքին անդրադարձ կատարուեցաւ դպրեվանքի ջամբած ուսման կարեւորութեան, հոգեւորականներու պատրաստութեան առաքելութեան, արեւմտահայերէնի պաշտպանութեան անհրաժեշտութեան, երիտասարդութիւն-եկեղեցի յարաբերութեան եւ այս իմաստով արձանագրուած բացթողումներուն:
Ապագայ լրագրողները շրջագայեցան դպրեվանքի տարբեր բաժանմունքները, ինչպէս նաեւ ծանօթացան դպրեվանքի շրջափակին մէջ գտնուող կոթողներուն ու հայ ժողովուրդի պատմութեան տարբեր փուլերը խորհրդանշող քանդակներուն եւ Հայոց ցեղասպանութեան յուշարձանին:
Ապա անոնք այցելեցին Ս. Աստուածածին վանք:
«Ապագայ լրագրող»-ներու երէկուան այցելութեան հիւրաբար միացաւ «Ազդակ»-ի երիտասարդ աշխատակիցներէն քանատաբնակ Լոռի Պէրպէրեան: