Հովանաւորութեամբ ԼՕԽ-ի Շրջանային վարչութեան, շաբաթ, 18 յունիս 2022-ին դաստիարակչական յանձնախումբը այս տարուան դասախօսութեան շարքը փակեց «Սրբալոյս միւռոն» խորագիրով դասախօսութեամբ մը` սրբալոյս միւռոնի պատրաստութեան ծիրին մէջ: Յանձնախումբի ատենապետ Ազնիւ Միքայէլեան բարի գալուստի խօսքէն ետք ըսաւ. «Հայաստանեայց առաքելական ս. եկեղեցւոյ հնաւանդ սրբութիւններէն է, որ, ըստ աւանդութեան, մեր Տիրոջ` Յիսուս Քրիստոսի կողմէ օրհնուած իւղը, Թադէոս առաքեալի ձեռամբ, Հայաստան կը բերուի, եւ ամէն անգամ որ սրբալոյս միւռոն կը պատրաստուի, հին միւռոնը նորին միախառնուելով` կ՛օրհնուի Ս. Գրիգոր Լուսաւորիչի սուրբ աջով: Ան աւելցուց` ըսելով, որ միւռոնի օրհնութիւնը սքանչելի առիթ է հոգեկան վերանորոգութեան, եւ Հայ առաքելական եկեղեցւոյ զաւակները միւռոնի դրոշմով կը հայանան ու մեր ազգութեան նկարագիրը կը զգենուն:
Ապա ան հրաւիրեց օրուան դասախօսը` Երեմիա աբղ. Տեկիրմեճեանը: Ան տուաւ պատմական հոլովոյթը` իւղով օծուելու, որ կանուխ դարերէն ի վեր սովորութիւն էր: Իւղով կ՛օծէին անոնք, որոնք Աստուծոյ կողմէ ընտրեալ մարդիկ կ՛ըլլային` իբրեւ նշան աստուածատուր պաշտօնի ստացման: Ապա ըսաւ, որ հին ատեն երեք տեսակ օծման իւղեր կային.
Ա.- Բուն միւռոնը, որ կաթողիկոսը կ՛օրհնէր:
Բ.- Մկրտութեան ձէթ, քահանան կ՛օրհնէր օրը օրին:
Գ.- Հիւանդաց ձէթ, որ պէտք եղած ատեն գործածուած իւղն է:
13-րդ դարէն ետք այս բոլոր իւղերը կը միաւորուին սրբալոյս միւռոնի մէջ:
Հայր Երեմիան մանրամասնեց. «Միւռոնին գլխաւոր նիւթը մաքուր ու անարատ ձէթն է, զտուած ու եփած, որուն կը միախառնեն արաբական կամ եգիպտական բալասան, դափնիի ձէթ եւ աւելի քան քառասուն տեսակ անուշահոտ ծաղիկներու եւ այլ բոյսերու հիւթերէն պատրաստուած իւղ»: Ան դիտել տուաւ, որ միւռոնօրհնէքի պահուն անոր կը միախառնեն հին միւռոնէն մաս մը, որպէսզի պահուի նուիրական շղթան, որ կ՛երթայ մինչեւ Գրիգոր Լուսաւորիչ եւ անկէ ալ մինչեւ Ս. Թադէոս առաքեալ:
Դասախօսութեան առընթեր, ցուցադրուեցաւ նաեւ Յովակիմ վրդ. Բանճարեանի կողմէ տեսերիզ, որ ամբողջական նկարագրութիւնը կը կատարէր միւռոնի պատրաստութենէն մինչեւ օրհնութիւն:
Գեղարուեստական բաժինով հանդէս եկան Ճիւնիի Ս. Յարութիւն եկեղեցւոյ սարկաւագները` հրամցնելով երեք շարականներ Ս. Հոգիի ուղղուած, «Սարսափելի», «Բացիր, Տէր, այսօր զգանձդ» եւ «Հոգի Աստուծոյ»:
Դասախօսութեան աւարտին Երեմիա աբղ. Տեկիրմեճեան ներկաներուն բաժնեց միւռոնի կաթսային մասին գիտելիքներու թերթիկներ: