Երէկ` հինգշաբթի, 26 օգոստոսին, Հայաստանի Ազգային ժողովը քուէարկութեամբ ընդունեց կառավարութեան 2021-2026-ի գործունէութեան ծրագիրը: Քուէարկութեան մասնակցեցաւ միայն «Քաղաքացիական պայմանագիր» խմբակցութիւնը` 70 թեր ձայներ տալով ծրագիրին, որուն եռօրեայ քննարկումը կայացաւ բուռն վէճերու մթնոլորտի մէջ:
Ընդդիմադիր խմբակցութիւնները` «Հայաստան»-ն ու «Պատիւ ունեմ»-ը, որոնք իրենց ելոյթներուն ընթացքին շեշտեցին, որ կառավարութեան այս ծրագիրը չի համապատասխաներ պետութեան խնդիրներուն, քուէարկութեան չմասնակցեցան, այլ «Քաղաքացիական պայմանագիր»-ի ներկայացուցիչի ելոյթէն եւ վարչապետ Նիկոլ Փաշինեանի ամփոփիչ խօսքէն առաջ լքեցին դահլիճը:
Կառավարութեան ծրագիրին առնչութեամբ Ազգային ժողովի նիստին «Հայաստան» եւ «Պատիւ ունեմ» խմբակցութիւններու ղեկավարները իրենց դիրքորոշումները ներկայացուցին:
Նիստէն ետք ընդդիմադիր երկու դաշինքները` «Հայաստան»-ն ու «Պատիւ ունեմ»-ը կատարուածին առնչութեամբ հրապարակեցին հաղորդագրութիւն մը: