Երկուշաբթի կէսօրէ առաջ ժամը 11:00-ին, խորհրդարանը գումարեց նախագահական ընտրութեան իր Դ. նիստը, օրինաթիւ գոյանալէն ետք:
Խորհրդարանի նախագահ Նեպիհ Պըրրի նախագահեց նիստին, որուն ներկայ գտնուեցան 110 երեսփոխաններ:
Նիստին ընթացքին կատարուած քուէարկութիւնը ստացաւ հետեւեալ պատկերը. Միշել Մուաուատ` 39 քուէ, 50 սպիտակ քուէ, «Նոր Լիբանան»` 13 քուէ, Իսամ Խալիֆէ` 10 քուէ եւ 2 չեղեալ քուէ:
Խորհրդարանը չկրցաւ նախագահական ընտրութեան իր երէկուան ժողովը երկրորդ նիստով մը շարունակել` օրինաթիւի չգոյութեան պատճառով:
Նիստին աւարտը յայտարարելէ ետք, խորհրդարանի նախագահը նշեց, որ յաջորդ նիստը սկզբունքով պիտի գումարուի հինգշաբթի, 27 հոկտեմբեր 2022-ին, եւ աւելցուց, որ յաջորդ նիստին թուականը աւելի ուշ պիտի ճշդէ եւ պաշտօնապէս ժողովի պիտի հրաւիրէ երեսփոխանները:
Նիստէն ետք երեսփոխան Միշել Մուաուատ հաստատեց, որ ինք կառչած կը մնայ իր թեկնածութեան, հակառակ անոր որ պատկերը կը կրկնուի:
Մուաուատ նկատել տուաւ, որ կայ իշխանութիւն մը, որ ինքզինք կ՛ուզէ պարտադրել, ինչպէս նաեւ երեսփոխաններն ու լիբանանցիները շանթաժի ենթարկել, որպէսզի նախագահական ընտրութեան երկրորդ նիստին ընթացքին օրինաթիւը վերացուի:
Իր խօսքը ուղղելով Հըզպալլային` Մուաուատ յայտնեց, որ իրենց դէմ ճշդուած դաւաճանութեան տրամաբանութեամբ կարելի չէ շարունակել: Ան նկատել տուաւ, որ համախոհական այն թեկնածուն, զոր քաղաքական մնացեալ ուժերը տակաւին կը փնտռեն, պէտք է իր փաստաթուղթերը ներկայացնէ Հըզպալլային եւ երաշխիքներ ստանայ, որպէսզի յաջողի: «Մենք կը մերժենք այս տրամաբանութիւնը, որովհետեւ եթէ ընդունինք զայն, ապա լիբանանցիներուն կեանքին ոչինչ տրամադրած կ՛ըլլանք», հաստատեց ան:
Երեսփոխան Ուատտահ Սատեք յայտնեց, որ ինք բարեկարգչական երեսփոխան է, սակայն բարեկարգչական երեսփոխաններու համախմբումին մաս չի կազմեր: «Ես քուէարկեցի ի նպաստ Միշել Մուաուատի», նշեց ան:
Ժողովրդավարական հանդիպում պլոքի երեսփոխան Հատի Ապուլ Հասան նշեց, որ իրենք համաձայն են Պըրրիի կողմէ Ազգային երկխօսութեան նիստի հրաւէրին ընդառաջելու` աւելցնելով, որ իրենք կը զօրակցին երկխօսութեան եւ կարեւոր կը նկատեն ներկայ մթնոլորտէն դուրս գալը, «որովհետեւ հինգշաբթի օրուան նիստէն ետք Լիբանանի դիմաց հորիզոնները կրնան փակուիլ», շեշտեց ան:
Հաւատարմութիւն դիմադրութեան պլոքի երեսփոխան Հասան Ֆատլալլա հաստատեց, որ սպիտակ քուէով մասնակցիլը իրաւունք է` աւելցնելով, որ իրենք տակաւին թեկնածուներու անուններ չունին:
Ֆատլալլա կոչ ուղղեց նախագահական թեկնածուի մը շուրջ համախոհութիւն գոյացնելու` ընդգծելով, որ իրենք կը փափաքին ընտրել հանրապետութեան նախագահը եւ բաց են տեղի ունենալիք որեւէ երկխօսութեան մասնակցելու:
Հզօր հանրապետութիւն համախմբումի երեսփոխան Ժորժ Ատուան յայտնեց, որ երեսփոխանական բոլոր պլոքները պէտք է իրենց որոշումները վերջնականացնեն: «Պէտք է հանրապետութեան նախագահ ունենանք», ըսաւ ան:
Ատուան շեշտեց, որ Միշել Մուաուատը գերիշխան եւ բարեկարգչական նախագահական թեկնածու է` նկատել տալով, որ ժողովրդավարութիւնը երկխօսութեան կարիք չունի, իսկ Հըզպալլայի հետ տարակարծութիւնը հիմնուած է սահմանադրութեան եւ օրէնքի վրայ: