Հայ կաթողիկէ Մեսրոպեան բարձրագոյն վարժարանի նախակրթարանի բաժինը այս տարի շատ իւրայատուկ եղանակով նշեց Մայրերու Օրը, որ ըստ էութեան տարածուեցաւ բազմաթիւ օրերու վրայ եւ ընդգրկեց զանազան ձեռնարկներ:
Հիմնական իւրայատկութիւնը այն էր, որ բոլոր ձեռնարկներուն ալ ապահովուած էր մայրերու մասնակցութիւնը` իրենց զաւակներուն կողքին: Այսպէս, նախակրթարանի բաժանմունքին կազմակերպութեամբ տարբեր օրերու տեղի ունեցան խաչբառի, ֆրանսերէնի եւ կրօնագիտական զարգացման մրցումներ, ինչպէս նաեւ ծաղիկներու յարդարման, պտուղի սալատի ու կարկանդակի պատրաստութեան պահեր:
Սոյն ձեռարկները ի մի բերին մեր աշակերտներն ու ծնողները, խանդավառութիւն ստեղծելով բոլորին մօտ:
Այս բոլորին նախորդած էր “Սիրելի Հայրիկ, Լաւագոյն Մարզիկ” մարզական օրը, այս անգամ մանկապարտէզին մէջ: Օրուան հերոսները եղան մանկապարտէզի աշակերտներն ու անոնց հայրերը. “Սիրելի Հայրիկ – Լաւագոյն Մարզիկ” միջոցառումը գեղեցիկ առիթ մը եղաւ մէկտեղելու մեսրոպեանական փոքրիկներն ու անոնց ծնողները՝ ուրախ եւ խանդավառ մթնոլորտի մը մէջ: Հայր ու զաւակ՝ մէկ խումբ կազմած, մրցակցեցան իրարու հետ մարզական տարբեր խաղերու մէջ, որոնց արդիւնքով լաւագոյնները ստացան բաժակներ, իսկ բոլորը՝ մասնակցութեան նշաններ: Խաղերուն ներկայ եղան նաեւ մայրերը, քաջալերելու համար իրենց ընտանեկան խումբերը:
Տեղեկատուական գրասենեակ
Հայ Կաթողիկէ Մեսրոպեան Բարձրագոյն Վարժարանի