Հըզպալլայի ընդհանուր քարտուղար սէյիտ Հասան Նասրալլա երէկ երեկոյեան ժամը 8:30-ին արտասանեց պատկերասփռուած ճառ մը, որուն մէջ անդրադարձաւ Լիբանանի նաւթային եւ կազային հարստութեան, ինչպէս նաեւ եւ ծովային սահմանագծումին, որ Լիբանանի եւ լիբանանցիներուն համար լուրջ մարտահրաւէր մըն է:
Սէյիտ Նասրալլա հաստատեց, որ Լիբանան այս օրերուն ընթացքին մուտք գործած է նոր փուլ մը եւ կը գտնուի լուրջ մարտահրաւէրի մը դիմաց` նկատի ունենալով յունական նաւը, որ Լիբանանի եւ Հիւսիսային Պաղեստինի միջեւ թիւ 29 սահմանագիծին կից գտնուող Քարիշի վիճելի շրջան հասած է ոչ թէ նաւթի ու կազի պեղում կատարելու, այլ` նաւթահորն ու կազահորը հորատելու:
«Գետնի վրայ արձանագրուած այս զարգացումին մասին լսեցինք յայտարարութիւններ եւ կարդացինք հաղորդագրութիւններ, որոնք լիբանանեան պետութեան կեցուածքները կ՛արտայայտէին: Նախորդ օրերուն պատահածը Լիբանանի դէմ յարձակում է եւ ընդվզեցուցիչ աքթ, ինչպէս նաեւ Լիբանանը դժուար կացութեան դիմաց զետեղել է, այլ խօսքով` բոլորս կը գտնուինք ազգային լուրջ հարցի մը դիմաց», ըսաւ ան:
Սէյիտ Նասրալլա հաստատեց, որ Լիբանանի ծովային սահմաններուն եւ անոր ջուրերուն մէջ գտնուող հարստութեան կապուած հարցը իսկապէս պէտք է ազգային լուրջ եւ յստակ հարց մը ըլլայ Լիբանան հայրենիքին հետ պատկանելիութիւն զգացող իւրաքանչիւր լիբանանցիի համար:
«Մենք դէմ յանդիման կը գտնուինք հսկայ գանձի մը, զոր կոչած էինք «Մեզի կից գտնուող գանձ»: Այս հարստութեան արժէքը այն է, որ անիկա միակ յոյսն է` լուծելու համար Լիբանանի տագնապները եւ Լիբանանը փրկելու: Այդ գանձը իւրաքանչիւր լիբանանցիի գանձն է», շեշտեց ան:
Սէյիտ Նասրալլա հաստատեց, որ պէտք է պաշտպանել այդ գանձը եւ հորատել զայն, ապա օգտուիլ այդ հարստութենէն` աւելցնելով, որ Լիբանանի նաւթային հարստութիւնը վտանգներ կը դիմագրաւէ:
«Այդ վտանգներէն առաջինն է այն, որ ամերիկեւիսրայէլեան ճիգ եւ ջանք կայ այդ գանձը յափշտակելու եւ իւրացնելու, իսկ երկրորդը` արգիլել Լիբանանին, որ իր նաւթահորերը հորատէ», ըսաւ սէյիտ Նասրալլա` աւելցնելով, որ այս իմաստով Լիբանան եւ Սուրիա շրջանին մէջ միակ երկիրներն են, որոնց արգիլուած է նաւթահորերու եւ կազահորերու պեղումը` պատժամիջոցներու ենթարկուելու խորագիրին տակ:
Ան աւելցուց, որ երրորդ վտանգը ուղղակիօրէն կապուած է ժամանակին, այսինքն` այն ատեն, երբ արտօնուի Լիբանանին պեղել եւ ապա հորատել, արդէն իսկ նաւթահորերուն մէջ հարստութիւն մնացած պիտի չըլլայ:
«Հետեւաբար մենք կը գտնուինք այնպիսի հարցի մը դիմաց, որ համազօր է բռնագրաւուած հողերու ազատագրման հարցին: Հարաւային Լիբանանը ազատագրելու օրակարգը 1985-ին արդէն իսկ առկայ էր, եւ Դիմադրութեան զոհողութիւններուն շնորհիւ կարելի եղաւ 2000-ին իրականացնել:
Մենք կ՛ուղղուինք դէպի ընդհարում` Լիբանանի նաւթային հարստութեան վերաբերող վտանգներուն առումով, եւ պէտք է իմանանք, որ ժամանակի ազդակը ի նպաստ մեզի չէ: Իւրաքանչիւր օրուան ուշացում կը նշանակէ լիբանանցի ժողովուրդի հարստութեան կորուստ», ընդգծեց ան:
Սէյիտ Նասրալլա շեշտեց, որ ուղղակի նպատակը պէտք է ըլլայ թշնամիին արգիլել Քարիշէն կազ եւ նաւթ հորատել:
«Նաւուն գտնուած վայրը չէ հարցը, այլ այն, որ թշնամին պիտի սկսի հորատել հոն գտնուող նաւթահորերն ու կազահորերը, ուր կը գտնուի այն հարստութիւնը, որ վիճելի է Լիբանանի եւ Իսրայէլի համար», ըսաւ ան:
Սէյիտ Նասրալլա ընդգծեց, որ այս իմաստով Լիբանան իրաւունք ունի այդ գանձին մէջ, կարիք ունի անոր` իր դիմագրաւած տագնապները լուծելու, ինչպէս նաեւ զօրութիւն ունի` բանակ եւ Դիմադրութիւն ունենալուն համար:
Ան շեշտեց, որ թշնամի Իսրայէլին կողմէ առնուած բոլոր քայլերը` սուզանաւերն ու ծովային երկաթեայ գմբէթը պիտի չկարենան պաշտպանել ջուրի վրայ ծփացող յունական այդ սարքը:
«Լիբանանցի ժողովուրդին կը յայտնենք թշնամիին հորատելու աշխատանքը արգիլելու Դիմադրութեան յանձնառութիւնը, իսկ որեւէ պատերազմի պարագային Իսրայէլի վնասները շատ աւելի պիտի ըլլան Լիբանանի կորուստներէն: Իսրայէլի կողմէ առնուելիք որեւէ անխոհեմ քայլ պիտի ունենայ իր հետեւանքները ո՛չ միայն ռազմավարական իմաստով, այլ նաեւ` գոյութենական առումով», յայտնեց ան:
Սէյիտ Նասրալլա անհրաժեշտ նկատեց Լիբանանի իշխանութեան երեք պետերուն կողմէ միացեալ կեցուածքով ներկայանալու կարեւորութիւնը, ինչպէս նաեւ լիբանանցի ժողովուրդին միակամ ըլլալու անհրաժեշտութիւնը:
«Մենք պէտք է քաղաքական նեղլիկ հաշիւներէ եւ տարակարծութիւններէ վեր ելլենք, որովհետեւ կը գտնուինք թշնամիի մը դիմաց, որ միջազգային բանաձեւերը չի ճանչնար եւ կը գործէ ուժի տրամաբանութեամբ», հաստատեց ան:
Սէյիտ Նասրալլա ընդգծեց, որ Դիմադրութիւնը լիբանանցիներուն եւ լիբանանեան պետութեան ընձեռուած հզօր ընտրանքներէն է` նկատել տալով, որ բազմաթիւ կարողութիւններ ունեցող ԴԻմադրութիւնը չի կրնար ձեռնածալ նստիլ եւ ձեռնածալ պիտի չնստի` Լիբանանի հարստութիւնը գողնալու իրականութեան դիմաց: «Այս իմաստով բոլոր ընտրանքները առկայ են», ըսաւ ան:
Սէյիտ Նասրալլա յայտնեց, որ իրենք պատերազմ չեն ուզեր, բայց եւ այնպէս պատերազմէն չեն վախնար: «Իսրայէլ պէտք է վերջ տայ Քարիշէն նաւթ եւ կազ հորատելու աշխատանքին, որովհետեւ անիկա մէկ նաւթահոր է եւ անոր ինքնութիւնը տակաւին վիճելի է», շեշտեց ան:
Սէյիտ Նասրալլա յայտնեց, որ յունական նաւը եւ անոր վարչութիւնն ու սեփականատէրերը պէտք է իմանան, որ Լիբանանի գերիշխանութեան դէմ ոտնձգութիւն կը կատարեն, հետեւաբար պէտք է իրենց նաւը այդ ջուրերէն հեռացնեն:
Ան հաստատեց, որ Դիմադրութիւնը օրական եւ ժամական դրութեամբ պիտի հսկէ արձանագրուող քայլերուն` աւելցնելով, որ իրենք այս մասին կազմած են յանձնախումբ մը, որ ամբողջական թղթածրար պիտի պատրաստէ: «Այս յանձնախումբին պիտի նախագահէ նախկին երեսփոխան Նաուաֆ Մուսաուի, որ պաշտօնապէս պիտի ստանձնէ այս աշխատանքը», ըսաւ ան:
Սէյիտ Նասրալլա շեշտեց, որ Միացեալ Նահանգներու եւ սիոնական գոյացութեան ռազմավարութիւնը Լիբանանը կը մղեն սովի, որ մեծ վտանգ կը սպառնայ երկրին ընկերային ապահովութեան, որ աւելի վտանգաւոր է, քան` քաղաքացիական պատերազմը:
«Պահանջուած է պետական եւ ժողովրդային միացեալ կեցուածք մը որդեգրել` Լիբանանի զօրութեան աղբիւրներուն համընկնող. այդ պարագային անպայման կը յաղթենք այս ճակատամարտին», եզրափակեց սէյիտ Նասրալլա: