ՌՈՒՍԻՈՅ, ՀԱՅԱՍՏԱՆԻ ԵՒ ԱՏՐՊԷՅՃԱՆԻ ԵՐԱԿՈՂՄ ՅԱՆՁՆԱԺՈՂՈՎԸ ՊԻՏԻ ՔՆՆԷ ՃԱՄԲԱՆԵՐՈՒ ՎԵՐԱԲԱՑՄԱՆ ՀԱՐՑԵՐԸ
ԵՐԵՒԱՆ, «Արմէնփրէս».- Հայաստանի փոխվարչապետ Մհեր Գրիգորեան լրագրողներու հետ ունեցած զրոյցին ընթացքին անդրադարձաւ Հայաստանի եւ Ատրպէյճանի միջեւ սահմանազատման եւ սահմանագծման շուրջ հնարաւոր աշխատանքներու սկսելու հարցին:
Ան շեշտեց, որ սահմաններուն մասին խօսելէ առաջ պէտք է ամբողջական կերպով սերտուի սահմաններուն վերաբերող իրաւական ամբողջ հիմքը, եւ, ընդ որում, իրաւական այն հիմքը, որուն մէջ կայ երկու երկիրներու համաձայնութիւնը, ստորագրութիւնը կամ միացումը փաստաթուղթի մը շուրջ:
Գրիգորեան դիտել տուաւ, որ անկէ ետք միայն կարելի կ՛ըլլայ խօսիլ քարտէսներու մասին, որովհետեւ քարտէսը ընդամէնը պատկեր է: «Քարտէզի տակ պէտք է լինի իրաւական հիմք եւ այդ իրաւական հիմքերի վրայ մենք հիմա աշխատում ենք, հետազօտում ենք, հաւաքագրում ենք եւ վերլուծելուց յետոյ նոր հնարաւոր կը լինի խօսել քարտէզների մասին` դրանց հիմա վրայ ինչ-որ գործընթացներ իրականացնելու նպատակով», նշեց Գրիգորեան:
Նոյն ժամանակ` փոխվարչապետը ընդգծեց, որ կան բազմաթիւ հարցեր, որոնք գործընթացները բաւական կը բարդացնեն: «Առանձին վերցրած գործընթացները որոշակի իրականացման տրամաբանութիւն կարող են ունենալ, բայց ընդհանուր մթնոլորտը պէտք է լինի շատ աւելի լաւը», դիտել տուաւ փոխվարչապետը` նկատի ունենալով Մայիս 2021էն ատրպէյճանական զինուած ուժերու ապօրինի ներխուժումը Հայաստանի տարածքը, ինչպէս նաեւ Ատրպէյճանի մէջ պահուող հայ գերիներու հարցը:
20-21 Հոկտեմբերին Հայաստանի փոխվարչապետը պիտի գործուղուի Մոսկուա` մասնակցելու Ռուսիոյ, Հայաստանի եւ Ատրպէյճանի եռակողմ յանձնաժողովի հանդիպման: Ան յայտնեց, որ պիտի քննարկուին տարածաշրջանին մէջ հաղորդակցութեան ուղիներու վերաբացման հարցերը:
«Որոշակի պատկերացումներ են ձեւաւորուել երկաթգծի մասով, նախնական համաձայնութիւն կայ, որ ապաշրջափակումը պէտք է իրականացուի ԱՊՀ երկրների կարգաւորումների հիման շրջանակներում: Մենք պէտք է քննարկենք աւտոճանապարհների հարցերը: Հայաստանի առաջնահերթութիւնն է տրանսպորտային բոլոր ուղիների ամբողջական ապաշրջափակումը», յայտնեց Մհեր Գրիգորեան: