Աւելի քան տարիէ մը ի վեր յապաղող կառավարութեան կազմութեան ճիգերը կը շարունակուին մէկէ աւելի ճակատներու վրայ: Արդարեւ, լրատուական եւ քուլիսային ճիգերու զարգացումները միաժամանակ ժխտական ու դրական մթնոլորտ մը ստեղծեցին` կառավարութեան կազմութեան նորագոյն ժամկէտ յայտարարելով յառաջիկայ շաբաթասկիզբը` երեքշաբթի օր: Լաւատեսներու այս վարկածը կը հիմնուի քուլիսներու ետին շարունակուող ներքին թէ արտաքին մակարդակներու հաղորդակցութեանց վրայ: Այս ծիրին մէջ ընդհանուր ապահովութեան ընդհանուր տնօրէն հազարապետ-զօրավար Ապպաս Իպրահիմ կը շարունակէ իր մագոգային հանդիպումները նախագահական պալատի` Պաապտայի եւ նշանակեալ վարչապետի նստավայրին միջեւ` հարթելու համար մետասաներորդ պահուն ցցուող խոչընդոտները: Նմանօրինակ «առաքելութեան» մէջ են Հըզպալլայի ընդհանուր քարտուղարի խորհրդականներէն շէյխ Ուաֆիք Սաֆա եւ Հիւսէյն Խալիլ: Կը թուի, թէ տնտեսութեան եւ ընկերային հարցերու նախարարներու նշանակումները նորագոյն հարցականներն են` նկատի ունենալով անոնց վարելիք զգայուն ու կարեւոր բանակցութիւնները` Դրամական Միջազգային դրամական ֆոնտին թէ կատարուելիք նիւթական օժանդակութեանց բաշխումին գծով:
Նաեւ` Արտաքին Մակարդակի Վրայ
Ներքին այս ճիգերուն առընթեր կը նախատեսուի, որ վերջերս Լիբանան այցելած ամերիկեան ծերակուտական պատուիրակութենէն ետք, այսօր Լիբանան հասնի եւրոպական պատուիրակութիւն մը` երկրի վարիչներուն հետ խորհրդակցելու կառավարութեան եւ այլ հրատապ հարցերու գծով: Նոյն միջոցին լիբանանեան պատուիրակութիւն մը այսօր պիտի մեկնի Սուրիա` արտաքին գործոց նախարար Ֆայսալ Մըքտատի հետ բանակցելու քաղաքական թէ տնտեսական հրատապ հարցերու շուրջ, ինչպէս` իրանեան նաւթի Սուրիոյ ճամբով Լիբանան փոխանցումը եւ յարակից հարցեր:
Լաւատես այս մթնոլորտի «ջատագովներուն» կարծիքով արդէն իսկ կազմուած է կառավարութեան կազմի «սեւագրութիւն» մը:
Սակայն «հովերը միշտ չէ որ նաւերու ակնկալութեամբ կը փչեն», կ՛ըսէ առածը: Փաստօրէն, նշեալ դրական յոյսերուն հակառակ, կարգ մը դէտերու մեկնաբանութիւնները կ՛ընթանան հակառակ ուղղութեամբ: Օրինակ, ըստ անոնց, կացութիւնը այնքան ալ վարդագոյն չէ, եւ շատ մը հարցեր տակաւին անորոշ են կամ չեն յստակացած: Այս իմաստով կառավարութեան կողքին պիտի նշանակուին նաեւ առանցքային դեր կատարող կարգ մը բարձրաստիճան պաշտօնատարներ փոխարինող անուններ (Կեդրոնական դրամատան կառավարիչ, բանակի ընդհանուր հրամանատար եւ այլն): Նմանապէս` կը նախատեսուի, որ վառելանիւթի պետական աջակցութեան նպաստը ամբողջութեամբ վերանայ ընթացիկ սեպտեմբերի կիսուն, փոխան վերջաւորութեան, ինչ որ կրնայ առաւել եւս սպառել առանց այդ ալ վառելանիւթի պակասէն տառապող քաղաքացիներու համբերութիւնը:
Նոյն ծիրին մէջ, արտակարգ ճիգեր կը տարուին կրթական թէ առողջապահական մարզերու բնականոնացման գծով, ուր նախագահ Աունի թելադրանքով, մօտերս կրթական հարցերու քննարկման արտակարգ համագումար պիտի կայանայ, մինչ կրթական մարզի պատկան այլ պատասխանատուներ յառաջիկայ երեքշաբթի օրը յայտարարած են «Կրթական ընդհանուր ցասումի օր»: Միւս կողմէ, հակառակ առողջապահութեան նախարարութեան նախաձեռնած «արհեստագիտական իրագործում» նկատուող` անվճար դեղատոմսի որոշումին` առողջապահական պատասխանատուներ դեռ եւս «ահազանգային» կը նկատեն այս մարզին վիճակը:
Դրական ու ժխտական ճիգերու մակընթացութեան մթնոլորտին մէջ, քաղաքացիներու հայեացքները ուղղուած են յառաջիկայ շաբթուան գծով տրուած «խոստումներու» արդիւնաւէտ իրագործումին: