Երէկ վարչապետարանին մէջ կառավարութիւնը գումարեց իր հերթական նիստը` նախագահութեամբ վարչապետ Հասսան Տիապի:
Տեղեկատուութեան նախարար Մանալ Ապտել Սամատ կառավարութեան նիստէն ետք ներկայացուց նիստին որոշումները: Ըստ նախարարին, վարչապետ Հասան Տիապ հաստատած է Միջազգային դրամական ֆոնտին հետ բանակցութիւնները ներքին գետնի վրայ շարունակելու կարեւորութիւնը եւ նշած, որ բանակցութիւնները ճշգրիտ պիտի ըլլան` ողջունելով Լիբանանին տրուելիք օժանդակութիւնը: Վարչապետը շեշտած է, որ լիբանանեան դրամանիշի արժեզրկումին վերաբերեալ հետաքննութիւնները պիտի շարունակուին, եւ կառավարութիւնը միջամուխ պիտի չըլլայ անոնց, սակայն քաղաքացիին իրաւունքն է տեղեակ ըլլալ պատճառներէն եւ արդիւնքներէն: Վարչապետ Տիապ կոչ ուղղած է յայտնաբերելու բոլոր մեղսակիցներուն անունները, ներառեալ անոնք, որոնք առնչութիւն ունին խարդախուած նաւթի թղթածրարին հետ: Ան աւելցուցած է, որ կառավարութիւնը կ՛ուզէ ճշմարտութիւնը բացայայտել առանց միջամտելու, եւ պիտի չընդունի որեւէ բացթողում կամ չարամտութիւն ամերիկեան տոլարի փոխանակման սակի բարձրացման եւ խարդախուած նաւթի հարցին առնչութեամբ:
Վարչապետը նաեւ յայտնած է, որ կարգ մը քաղաքացիներու կողմէ նախազգուշական միջոցառումներուն չհետեւիլը պատճառ դարձած է, որ «Քորոնա» ժահրը կրկին տարածուի` յայտնելով, որ եթէ ատիկա փաստուի, ընդհանուր փակումը պիտի երկարաձգուի: Նշուած է նաեւ, որ առողջապահութեան նախարարութիւնը պիտի կատարէ յաւելեալ քննութիւններ` ճշդելու համար վտանգին չափը:
Նախարար Ապտել Սամատ հաղորդեց, որ ընդհանուր զօրաշարժի ծիրին մէջ կառավարութիւնը որոշում տուած է, որ բանակը եւ ապահովական ուժերը գրաւեն ապօրինի ձեւով Լիբանան մուտք գործող եւ անկէ դուրս եկող բոլոր նիւթերը: Պիտի գրաւուին նաեւ մաքսանենգութեան համար օգտագործուած ինքնաշարժներն ու բեռնատարները: Նախարարը աւելցուց, որ կառավարութիւնը փոխըմբռնման համաձայնագիր հաստատած է այն ընկերութիւններուն հետ, որոնք շահագրգռուած են ելեկտրականութեան գործարաններ հիմնելու Լիբանանի մէջ:
Նախարարը նաեւ հաղորդեց, որ քննարկումներ կատարուած են Կեդրոնական դրամատան կառավարիչին հետ` շուկային մէջ ամերիկեան տոլար ներմուծելու համար: