Վարչապետ Նեժիպ Միքաթի երէկ առաւօտեան վարչապետարանին մէջ նախագահեց կառավարութեան նիստին, որուն ընթացքին շարունակուեցաւ 2022-ի պետական ամավարկի օրինագիծի քննարկումը:
Նիստին աւարտին տեղեկատուութեան նախարարի գործակատար Ապպաս Հալապի յայտնեց, թէ քննարկումը շարունակուած է, ինչպէս նաեւ ընդգծուած, որ 2022-ի ամավարկին հետապնդած նպատակները պէտք է բացատրուին քաղաքացիներուն:
Հալապի յայտնեց, որ նիստին ընթացքին որոշուեցաւ այսօր առաւօտեան ժամը 9:00-ին դարձեալ գումարել նիստ մը, որուն ընթացքին պիտի կարդացուի ամավարկին մասին ելեւմուտքի նախարարին պատրաստած տեղեկագիրը, ինչպէս նաեւ նախարարները պիտի շարունակեն քննարկել ամավարկին մնացեալ յօդուածները` զայն որդեգրելու համար:
Հալապի նկատել տուաւ, որ ամավարկին մասին ստեղծուած տեղեկատուական ամպրոպը կը նպատակադրէ պետութեան նկատմամբ վստահութիւնը քանդել` աւելցնելով, որ այս քայլին նպատակն է միայն կարգ մը ուժերու շահերը ապահովել:
Հալապի յայտնեց, որ նախարարաց խորհուրդը չկրցաւ ամերիկեան եւ մաքսատնային տոլարի փոխարժէքի վերջնական սակ մը ճշդել` աւելցնելով, որ մաքսատնային տոլարին փոխարժէքը կարելի է համազօր դարձնել «Սայրաֆա»-ի ճշդած փոխարժէքին:
Հալապի յայտնեց, որ կառավարութիւնը կը սերտէ պետական մարզի պաշտօնեաներուն աշխատավարձը սրբագրել` պետական գանձարկղին տրամադրած կարելիութեան սահմաններուն մէջ: