Նախագահութեամբ վարչապետ Նեժիպ Միքաթիի, կառավարութիւնը երէկ առաւօտեան վարչապետարանին մէջ գումարեց իր նիստը, որուն ընթացքին շարունակեց 2022-ի պետական ամավարկի օրինագիծի քննարկումը:
Նիստէն ետք տեղեկատուութեան նախարարի տեղակալ Ապպաս Հալապի յայտնեց, որ կառավարութիւնը համաձայնութիւն չէ գոյացուցած մաքսատնային տոլարի փոխարժէքին շուրջ, եւ ելեկտրականութեան թղթածրարին քննարկումը յետաձգած է չորեքշաբթի, 2 փետրուարին: Այդ թղթածրարը պիտի քննարկուի զոյգ նիստերու ընթացքին:
Հալապի նշեց, որ նախարարաց խորհուրդը վաւերացուցած է պետական մարզին տրամադրուելիք ընկերային օժանդակութիւնը, որ պիտի տրամադրուի ամսական աշխատավարձի 75 առ հարիւրին հիման վրայ, այսինքն` ոչ նուազ քան 2 միլիոն լ. ոսկի եւ ոչ առաւել քան 4 միլիոն լ. ոսկի: «Նոյն համեմատութիւնը նկատի առնուած է նաեւ հանգստեան կոչուած պաշտօնեաներուն պարագային», ըսաւ Հալապի:
Ան նշեց, որ ընկերային օժանդակութիւնը պիտի ներառէ պետական հաստատութիւններուն, Ընկերային ապահովագրութեան ազգային սնտուկին (տաման), կրթական մարզին եւ հիւանդանոցներուն պաշտօնեաները:
Հալապի յայտնեց, որ նիստին ընթացքին ներքին գործոց եւ քաղաքապետութեանց հարցերու նախարար Պասսամ Մաուլաուի յայտնեց, որ ապահովութեան ուժերը բացայայտած են 17 լրտեսական ցանցեր, որոնք Լիբանանի տարածքին կը գործէին` ի նպաստ Իսրայէլի:
Միւս կողմէ, ան նկատել տուաւ, որ հանրապետութեան նախագահ զօր. Միշել Աուն արտաքին գործոց եւ արտերկրի լիբանանցիներու հարցերու նախարար Ապտալլա Պու Հապիպէն պահանջեց ապահովութեան խորհուրդին մօտ բողոքել Իսրայէլի դէմ` լիբանանեան օդային տարածքը օգտագործելով Սուրիան ռմբակոծելու անոր արարքին համար:
Հալապի աւելցուց նաեւ, որ նիստին ընթացքին վարչապետ Միքաթի նախարարաց խորհուրդին ներկայացուցած է քուէյթեան յուշագիրին իբրեւ պատասխան լիբանանեան նամակին ստեղծած մթնոլորտին մանրամասնութիւնները:
Հալապի յայտնեց, որ կառավարութիւնը քննարկած է նաեւ ընկերային բնոյթի հաստատութիւններուն տրամադրուելիք պետական օժանդակութիւններուն հարցը, ինչպէս` ծերանոցները, յատուկ կարիք ունեցողներու կեդրոնները, թմրամոլութեան ախտէն բուժուելու եւ ընտանեկան բռնութեան ենթարկուած կիներու յատուկ կեդրոնները: «Այս կեդրոններուն տրամադրուելիք պետական օժանդակութիւնը վաւերացուեցաւ 400 միլիառ լ. ոսկիով», ըսաւ Հալապի:
Իր կարգին, ընկերային հարցերու նախարար Հեքթոր Հաժժար յայտնեց, որ այսօր կ՛աւարտի «daem» ե-հարթակին վրայ կատարուելիք ընկերային օժանդակութիւններու դիմելու արձանագրութիւններուն ժամկէտը` աւելցնելով, որ աւելի ուշ պիտի հրաւիրեն մամլոյ ասուլիսի մը` բացատրելու համար բոլոր մանրամասնութիւնները:
ՆՇԵՆՔ, որ խորհրդարանի նախագահ Նեպիհ Պըրրի բարձր գնահատեց ապահովութեան ուժերուն կողմէ իսրայէլեան գործակալներու ցանցերուն բացայայտումը: Ան ողջունեց ապահովութեան ուժերը, որոնք կը հսկեն Լիբանանի ապահովութեան եւ կ՛ամրապնդեն անոր քաղաքացիական անվտանգութիւնը: