ՍԱՆԿՏ ՊԵՏԵՐԲՈՒՐԳ, 25 ՄԱՅԻՍԻ, ԱՐՄԵՆՊՐԵՍ: Հայաստանի «Արմենպրես» պետական լրատվական գործակալությունը մայիսի 25-ին Սանկտ Պետերբուրգում լրատվության փոխանակման և համագործակցության համաձայնագիր է ստորագրել Կուբայի պետական լրատվական Prensa Latina գործակալության հետ: Համաձայնագիրը ստորագրել են «Արմենպրես» գործակալության տնօրեն Արամ Անանյանը և Prensa Latina-ի նախագահ Լուիս Էնրիկե Գոնսալեսը: Նրանք Սանկտ Պետերբուրգում են Միջազգային տնտեսական համաժողովի ընթացքում անցկացվող աշխարհի լրատվական գործակալությունների գագաթնաժողովի շրջանակում:
«Մեզ համար շատ կարևոր էր ստորագրել համաձայնագիր կարիբյան տարածաշրջանում ամենաառաջատար գործակալություններից մեկի՝ Prensa Latina-ի հետ: Մենք «Արմենպրես»-ում կարծում ենք, որ համագործակցությունը լրատվական գործակալությունների միջև նման է ժողովուրդների միջև կամուրջներ կառուցելուն: Դրանք նոր կամուրջներ են, որոնք իրականում օգնում են մեր ժողովուրդներին՝ ավելի հեշտ հասկանալ մեկը մյուսին, ամրապնդել մարդասիրական կապերն ու խորացնել միմյանց մշակույթի ճանաչելիությունը: Դրանք լավ գործիքներ են նաև զբոսաշրջության զարգացման տեսանկյունից, ինչպես նաև նպաստում են ժողովուրդների միջև շփումներին ու միմյանց շատ ավելի լավ հասկանալուն»,- ասաց «Արմենպրես»-ի տնօրեն Արամ Անանյանը:
Լուիս Էնրիկե Գոնսալեսը ևս կարևորեց Հայաստանի պետական լրատվական գործակալության հետ համաձայնագրի ստորագրումը՝ նշելով. «Դուք Հայաստանում տեղի ունեցող իրադարձությունները լուսաբանող հավաստի աղբյուր եք: Ցույց եք տալիս իրական պատկերը ոչ միայն քաղաքական, այլև սոցիալական, մարզական, գիտական ոլորտներում»:
Գործակալությունների միջև համաձայնագրի ստորագրումը ենթադրում է անգլալեզու լրատվական բովանդակության, լուսանկարների փոխանակում: Բացի այդ, «Արմենպրես»-ն ու Prensa Latina-ն հատուկ ուշադրություն են դարձնելու երկու երկրներում կարևոր իրադարձությունների ու երկկողմ հարաբերությունների լուսաբանմանը:
Կուբայի պետական Prensa Latina գործակալությունը հիմնվել է 1959 թվականին՝ հայտնի հեղափոխական գործիչ Էռնեստո Չե Գևարայի նախաձեռնությամբ: Ներկայում այն լուրեր է հաղորդում 6 լեզվով՝ իսպաներեն, անգլերեն, պորտուգալերեն, ռուսերեն, ֆրանսերեն և իտալերեն:
«Արմենպրես» լրատվական գործակալությունը հիմնադրվել Է 1918 թվականի դեկտեմբերի 18-ին: Այսօր այն օրական հրապարակում է շուրջ 300 լուր՝ հայերեն, ռուսերեն, անգլերեն և արաբերեն։
«Արմենպրես»-ը միջազգային լրատվական 4 կազմակերպությունների անդամ է: Գործակալությունը Հայաստանը ներկայացնում է ԱՊՀ Ինֆորմխորհրդում, Սևծովյան տարածաշրջանի ազգային լրատվական գործակալությունների խորհրդում, Հարավարևելյան Եվրոպայի և բալկանյան պետությունների ազգային լրատվական գործակալությունների խորհրդում (դիտորդ) և Լրատվական գործակալությունների համաշխարհային կոնգրեսում: 2014-2016թթ. «Արմենպրես»-ը ղեկավարել է Սևծովյան տարածաշրջանի ազգային լրատվական գործակալությունների խորհուրդը, որի և ԱՊՀ Ինֆորմխորհրդի 2014թ. նիստերն անցկացվել են Երևանում:
«Արմենպրես»-ը երկկողմ են գործակցության պայմանագրեր ունի աշխարհի ավելի քան 20 առաջատար լրատվական գործակալությունների հետ, որոնց շուրջ մեկ երրորդը կնքվել է վերջին հինգ տարիներին: Գործընկերների թվում են ՏԱՍՍ-ը, Ռոյթերսը, Սինխուան, ԻՌՆԱ-ն, ՄԵՆԱ-ն, ԲՏԱ-ն, Ագերպրեսը, ԲԵԼՏԱ-ն, Կազինֆորմը, շատ այլ լրատվամիջոցներ, որոնց հետ իրականացվում է տեղեկությունների եւ լուսանկարների փոխանակում:
Գործակալության աշխատակիցները պարբերաբար մասնակցում են միջազգային տարբեր համաժողովների, լրատվական ցուցահանդեսների և ուսուցման ծրագրերի: