Լիբանանի մէջ Ֆրանսայի դեսպան Անն Կրիօ յայտնեց, որ Ֆրանսայի նախագահ Էմանուէլ Մաքրոնի` Ծոցի երկիրներ կատարած այցելութիւնը եւ Սէուտական Արաբիոյ գահաժառանգ իշխան Մոհամետ պըն Սալմանի հետ հանդիպումին արդիւնքները պէտք է լիբանանեան իշխանութիւններուն կողմէ դրական կերպով ընկալուին:
Կրիօ հաստատեց, որ Լիբանան պէտք է գործադրէ իրմէ պահանջուած բարեկարգումները` կասեցնելու համար տնտեսական եւ ելեւմտական փլուզումը, ինչպէս նաեւ պէտք է հակակշիռի տակ առնէ իր ցամաքային սահմաններն ու կասեցնէ թմրեցուցիչի մաքսանենգումը:
Կրիօ նշեց, որ Լիբանանին տրամադրուելիք ֆրանսական-սէուտական օժանդակութիւնները լիբանանեան պետութեան միջոցաւ պիտի չկատարուին` աւելցնելով, որ այս մէկը սէուտական նախապայման է:
Դեսպանը ընդգծեց, որ Ֆրանսա պիտի շարունակէ լիբանանեան բանակին օժանդակել` աւելցնելով, թէ նախորդ տարուան ընթացքին Ֆրանսա 4 միլիոն եւրօ, ինչպէս նաեւ սննդեղէն եւ դեղորայք տրամադրած է բանակին:
Անդրադառնալով Հըզպալլայի զէնքին հանդէպ Ֆրանսայի կեցուածքին` Կրիօ շեշտեց, որ այս իմաստով Փարիզի կեցուածքը յստակ է: «Երկրին գերագոյն ուժը կը պատկանի պետութեան եւ բանակին», ըսաւ ան:
Երեսփոխանական ընտրութիւններուն անդրադառնալով` Կրիօ հաստատեց, որ ընտրութիւնները սահմանադրութեամբ ճշդուած թուականին կատարելը պիտի ըլլայ լիբանանցի պատասխանատուներուն կողմէ իրենց խոստումներուն յանձնառու եւ հաւատարիմ մնալու իսկական քննութիւն մը: