Ուրբաթ, 17 մարտ 2023-ին, երեկոյեան ժամը 8:00-ին, «Յակոբ Տէր Մելքոնեան» թատերասրահին մէջ տեղի ունեցաւ Համազգային հայ կրթական եւ մշակութային միութեան 95-ամեակի յոբելենական հանդիսութիւնը:
Ձեռնարկին բացման խօսքը արտասանեց Համազգայինի Շրջանային վարչութեան անդամ Շաղիկ Յովսէփեան-Յարութիւնեան: Օրուան բանախօսն էր Համազգայինի «Վահէ Սէթեան» հրատարակչատան եւ «Լիւսի Թիւթիւնճեան» ցուցասրահի տնօրէն Յակոբ Հաւաթեան: Գեղարուեստական յայտագիրով ելոյթ ունեցան «Գուսան» երգչախումբը, ջութակի «Թրիօ»-ն, «Գասպար Իփէկեան» թատերախումբը, ժողովրդական գործիքները` տհոլ եւ տուտուկ, «Քնար» պարախումբը, ինչպէս նաեւ միջազգային դաշնակահար եւ յօրինող Սէրուժ Գրաճեան: Ցուցադրուեցաւ նաեւ աշխարհի տարածքին Համազգայինի ունեցած գործունէութիւններու մասին տեսերիզ մը:
Աւարտին տեղի ունեցաւ պարգեւատրում` Համազգայինի մէջ երկարամեայ ծառայութիւն ունեցող անձերուն: Հանդիսութիւնը փակուեցաւ Լիբանանի հայոց թեմի առաջնորդ Շահէ արք. Փանոսեանի սրտի խօսքով: