ԵՐԵՎԱՆ, 14 ՕԳՈՍՏՈՍԻ, ԱՐՄԵՆՊՐԵՍ: Հայաստանի արտաքին գործերի նախարարի մամուլի խոսնակի ժամանակավոր պաշտոնակատար Աննա Նաղդալյանն անդրադարձել է Կասպից ծովի կարգավիճակի մասին հռչակագրին և Հայաստանի վրա դրա ազդեցությանը: Ինչպես հաղորդում է «Արմենպրես»-ը, օգոստոսի 14-ին կայացած ճեպազրույցի ընթացքում Աննա Նաղդալյանն ընդգծեց, որ այդ հռչակագիրը վերաբերվում է Կասպից ծովի ափամերձ 5 երկրներին:
«Այստեղ մենք մեկնաբանելու շատ բան չունենք: Բայց մենք հետևում ենք բոլոր այն գործընթացներին, որոնք կարող են ուղղակիորեն կամ անուղղակիորեն ազդեցություն ունենալ Հայաստանի վրա»,- ասաց նա:
Անդրադառնալով հարցին, թե այդ հռչակագրի ստորագրումն ի՞նչ ազդեցություն կարող է ունենալ Հայաստանի վրա՝ Աննա Նաղդալյանն ասաց, որ Հայաստանը հետևում է զարգացումներին և դրանցից կախված կանի համապատասխան հետևություններ:
Կասպյան հնգյակի երկրների՝ Ռուսաստանի, Ղազախստանի, Ադրբեջանի, Թուրքմենստանի և Իրանի ղեկավարները Ղազախստանի Ակտաու քաղաքում ստորագրել են Կասպից ծովի իրավական կարգավիճակի մասին հռչակագիրը:
Կասպյան գագաթնաժողովի ավարտին հռչակագրի տակ իրենց ոտորագրությունն են դրել ՌԴ նախագահ Վլադիմիր Պուտինը, Ադրբեջանի նախագահ Իլհամ Ալիևը, Թուրքմենստանի նախագահ Գուրբանգուլի Բերդիմուհամեդովը, Ղազախստանի նախագահ Նուրսուլթան Նազարբաևը և Իրանի նախագահ Հասան Ռոհանին:
Փորձագետները 5 երկրների ղեկավարների կողմից ստորագրված հռչակագիրն անվանել են «Կասպից ծովի Սահմանադրություն»: Ստորագրված հռչակագրի համաձայն՝ Կասպից ծովի ջրային մակերեսի ընդհանուր տարածքը մնալու է կողմերի ընդհանուր օգտագործման համար, իսկ հատակը և ընդերքը բաժանվում են հարևան պետությունների միջև միջազգային իրավունքի հիման վրա նրանց միջև ձեռք բերված պայմանավորվածությունների համաձայն: